Sabalenka bul ṭanna tur Brisbane International

Tennis season a zo fel chauh a, season thar bul ṭanna tur an ngaihtuah leh ṭan nghal - thla khat vel chauh chawlh a awm avangin hun an ngah lo a ni.

Australian Open champion lai Aryna Sabalenka pawhin a nomawi humhim ngei a tum, chumi atana inbuatsaihna leh season khuhhawn nan Brisbane International a hmang dawn tih a sawi chiang.

Inelna hi kumin December 31 aṭanga nakkum January 7 chhungin Brisbane-ah khelh a ni dawn. Australia Open finalist Elena Rybakina pawh a inlan ang.

Grand Slam vawi li champion tawh, world number 1 hlui ni bawk Naomi Osaka pawhin a hming a pe lut tawh a, hmeichhe player ṭha an tel tam dawn avangin inelna boruak a sang dawn - a hmuhnawm khawp ang.

World number 2 Sabalenka chuan, “Australia ram aṭangin inelna bul ka ṭan dawn a, chumi tana Brisbane International ka khel thei tur hi ka lawm. Australia hian ka thinlungah hmun pawimawh tak a chang, Grand Slam title ka lak hmasakna ber a nih avangin ka ngaihlu,” a ti.

Tournament director Cam Pearson pawhin inelna an buatsaih turah player ṭha an tel tam dawn avangin an phur tih a sawi. Mipa lamah pawh tunlaia hmasawn tak world number 17 Ben Shelton leh Grand Slam vawi thum champion tawh Andy Murray te an inlan dawn tih a sawi bawk.