South Indian derby-ah goal ruk a lut!

Nilaini zan Indian Super League inkhelah Kerala Blasters leh Chennaiyin an intawng a, goal ruk a lut - team pahnih hi 3-3 in an inhnehtawk a, ISL inkhel hmuhnawm zinga chhiar tel ngai a ni.

Chennaiyin lam hian goal an khung hma hle. Rahim Ali chuan minute khatna lekah mikhual team tan hmahruaina goal a khung a, Jawaharlal Nehru International Stadium-a fans sing chuang pungkhawm thawm a reh.

Mahse, a rei lo. Minute 11-naah Blasters-in penalty an hlawh chhuak a, Dimitrios Diamantakos chuan harsatna nei loin goal-ah a chantir - a hma lawka thawm reh takte khan thawm ring tak an chhuah zui.

Blasters hlim chhung erawh chhum rei lotê lo lang a, ral leh ang chauh a ni - minute hnih hnuah Chennaiyin hian penalty an hlawh chhuak ve leh a, Jordan Murray chuan goal-ah a chantir a, 2-1 a ni leh der.

An la duhtawk lo cheu! Australian striker Jordan Murray a inlar nawn a, minute 24-naah Chennaiyin tan a khung leh a, 3-1 a ni. Mahse, Blasters-in mahni muala tlawm an tum bik lo.

Minute 38-naah Kwame Peprah chuan a khung ve leh a, 2-3 in chawlhlawk an hmang a, Blasters-in beisei bo loin chawlhlawk an hmang.

Second half a ni a, rin angin goal kan hmu lawk lo. Mahse, minute 59-naah Diamantakos a inlar a, Greek striker hian si phurh sutna goal a khung. Hun tawp thlengin goal dang a lut tawh lo a, 3-3 in inkhel a tawp.

Nizanah ISL inkhelah Bengaluru leh Punjab FC an intawng a, result kan hre hman lo. Zanin dar 8:00-ah match pakhat a awm dawn a, Jamshedpur leh Odisha an intawng ang.