Magpies vs Man Utd UCL khel tur zawnna

Zanin dar 1:30 hian Premier League inkhel hmuhnawm en tur a awm dawn a, Newcastle United leh Manchester United te St James' Park-ah an inkhel dawn. Tun dinhmunah Eddie Howe leh Erik Ten Hag-a hote hian champion zia an chhuah lo a, chuvangin an inkhel tur hi season thara Champions League khel tur zawnna a tih theih ang.

Kar laihawlah Magpies-in Paris-ah result duhawm bik hlawhchhuah inbeisei mah se injury time-a penalty sawi hlawh hmangin goal an chhuah a, an kim lo chungin Kylian Mbappe telna team PSG nen 1-1 in an inhnehtawk.

Man United pawhin result duhawm an hlawh chhuak bik lo a, Istanbul-ah Galatasary lakah ṭum hnih ngawt goal hnihin hma hruai mah se Turkish club-in an sut zo vek. A tawpa an kawh rawn chu goalkeeper Andre Onana a ni a, Cameroonian keeper hian Hakim Ziyech freekick chu ṭum hnih ngawt ho lam takin a chhuah.

Hliam nei ngah Newcastle-in UCL-a an ziahluh loh Matt Ritchie leh Emil Krafth te an chhawr leh thei dawn a, Sean Longstaff, Sandro Tonali leh Joe Willock te awm loh chhungin kum 17 mi Lewis Miley a khel ṭha ṭhin. Player pawimawh Sven Botman, Dan Burn leh Callum Wilson te an la khel thei dawn lo a, mahse Howe-a hote hi Chelsea sawptu leh PSG chelh theitu an ni. Alexander Isak leh Anthony Gordon te hmangin an goal bawh a na dawn a, Miley dinpui Bruno Guimarães leh Joelinton te hi club lian zawk enthlak an ni tawh ngei ang.

Manchester United lamah Alejandro Garnacho-a'n match zawnin goal a khung a, kum 18 mi Kobbie Mainoo mawlh hi - a kum naupang mah se bench-a awm atan chuan a uiawm deuh. Hrem vanga UCL khel thei lo Marcus Rashford a rawn kir dawn a, Rasmus Hojlund-a'n Premier League-a a goal hmasa ber khung a tum dawn.

Season liam ta League Cup final-ah Man United-in Magpies hnehin nomawi an chawi a, kuminah erawh Howe-a hote hian Ten Hag-a hote hi an pet chhuak. Chelsea an sawpna hmun St James' Park-ah Magpies-in Man United hneh an tum dawn a ni.