Tlai dar 2:00-ah Project Veng Vs Electric Veng

Zote Toyota MPL10-ah Project Vengin match hnuhnung berah an elpui FC Venghnuai an hneh loh avangin table mawng berah an awm a, relegate chhuahsan turin point thum an mamawh. Vawiin tlai dar 2:00 hian Kolasib club-in paruknaa awm Electric Veng an hmachhawn dawn a, chak tumin an khel ang.

Project Vengin an khelh dan aṭangin ruahmanna an nei ṭha tih a lang a, team enkawltuten an player neih ang te an rem uluk ṭhin hle. Chutihrualin Kolasib aṭanga Aizawla inkhel tura zin chho ṭhin an nih avangin zin kawngah thahrui an hmang ṭhen tih a lang a, MPL-a tawnhriat nei lo player an ngah an tuar bawk.

Electric Veng hi kum hmasa lama Electric Veng FC kan hmuh ṭhin ang kha a ni lo a, kuminah chuan Aizawl South Football Academy nen an inthlunzawm. Mizoram aiawh pawha khel tawh C. Lalhriatpuia an kawl a, player dang erawh academy-a awm player-te an ni hlawm.

Match hnuhnung bera Chhinga Veng laka an chak loh ṭumin tawnhriat nei ṭha H. Zawnhmingthanga hnawhchhuah a ni a, midfield-ah tun hnaia hmasawn nasa tak KC Malsawmsanga te an pawimawh lehzual ang.