Police tan I League club hnehna hun ṭha

Zote Toyota MPL10-ah vawiin chhun dar 12:00 hian Aizawl FC leh Mizoram Police te RG Stadium-ah an inkhel dawn. AFC hi I League match khela an zinchhuah mek avangin senior player zinga zin lo leh academy player-ten Police hi an hmachhawn ang.

Lalbiaksanga Colney kaihhruai Police hian match hnuhnung berah an elpui Chawnpui FC an hneh a, Aizawl FC kim lo laka hnehna chan hi point thum tho a nih avangin vawiin hi dinhmun sawhngheh theihna hun ṭha a ni.

Chutihrualin Aizawl FC lamah hian Chawnpui laka goal khungtu Malsawmfela veng thiam defender Rohmingthanga te an tel thei dawn a, RG Stadium-ah Rohminga'n Sawmfela a veng tur hi hmuhnawm a tling ang.

AFC hi coach Victor Lalbiakmawia, Mission Vengthlang leh academy enkawltu Benjamin Zothanmawia hoin an khel dawn a, amaherawhchu mawhphurna chelhtu tur ber coach Victor hi Srinagar-a AFC A Licence Course a chhim avangin nimin khan Aizawl a rawn thleng chauh.

A Licence Course hi Victor bakah Lalruatliana Sailo (Toia), Vaivakawn leh Stephen Tawnthansanga, Muthi ten an chhim bawk a, Mizo football tan chanchin ṭha a ni.