Futsal thiam ber Sihphir Venghlun

D. Buanga & Sons Inter Village Futsal Tournament 2023 final-ah Sihphir Venghlun chuan Electric Veng 4-3 a hnehin an champion. Champion-na tura goal hnih khungtu Liansanglura chu final-a man of the match-a thlan a ni a, Sihphir Venghlunin mimal lawmman an hui fai. Vanlalpeka chu best goalkeeper a ni a, final-a goal hmasa ber khungtu PC Lalruatsanga best player-a thlan a ni.

Inelna hi MFA leh Tlangnuam Games & Sports Association buatsaih a ni a, Mizoram pum huap inelnaah hian team 128 an tel. A tawpah team ṭha pahnihin final an lut a, Philip Remthanga Indoor Stadium, Tlangnuama entu khat ṭhap hmaah futsal hmuhnawm tak an pho chhuak.

Final-ah MFA honorary secretary Lalnghinglova Hmar-in thu a sawi a, Tetea Hmar chuan inelna sponsor-tu D. Buanga & Sons bakah MFA thawhpui Tlangnuam GSA chungah lawmthu a sawi. Reliance Young Champs-a football coach-ten final hi an thlir a, Tetea Hmar chuan Reliance nena thawhhona kawngah tuna futsal inelna hian rah ṭha thlen a beisei thu a sawi bawk.

Nomawi inchuhnaah hian mipui thawm a ring a, inkhel a nung ṭha. PC Lalruatsanga'n counter attack aṭangin Sihphir Venghlun tan minute 11-naah a goal a khung a, minute li hnuah Electric Veng captain Lalsangkima'n dinglam kil aṭangin ṭha zetin si phurh a sut.

Futsal hi minute 25-25 a khelh a ni a, first half-ah 1-1 a ni. Sihphir Venghlun captain JH Lianzuala'n a hmaa Lalrinzuala ding chungin a pet thut a, minute 35-naah hmahruaina goal a khung - an veng mipuite nen inkuahin goal khung an lawm.

Electric Veng an insiamṭha lo, minute 39-naah captain JH-a khung ang deuh thoin Liansanglura'n a rawn khung a, minute khat hnuah Sanglura hian a khung belh. Goal lina luh theihna tura JH-a pass a tawih hle.

Lalhlimpuia (Tata) hoa khel Electric Veng an beidawng lo a, 4-1 a nih hnua an goal bawh chu na tak a ni. Minute 44-naah Lalṭhakima'n amah vengtu JH-a 'cut-in' goal ṭha zet a khung a, Electric Vengin beiseina thar an nei. Minute khat hnuah keeper Vanlalhruaia'n Electric Veng tan goal a rawn khung leh bawk a, minute 45-naah 4-3 a ni.

Minute nga inkhelh tur a la awm a, a tawp thlengin inkhel boruak a ṭang. Sihphir Venghlun keeper Vanlalpeka a che ṭha a, goal khung thei player Tata goal khung loin a siam. Entu mipui chezia a mawi a, team pahnihin infiammi rilru an pu. Electric Vengin chak loh dan an thiam a, Sihphir Venghlunin an thawhrim rah leh khawtlang anga an ṭanrual rah an seng. Mizoram futsal khel thiam ber veng chu Sihphir Venghlun a ni.