Santosh Trophy-ah kalphung thar

77th National Football Championship for Santosh Trophy final round-ah kumin inelna aṭangin quarterfinal a awm dawn. Final round fixtures hi November 30, Ningani khan tihchhuah a ni a, Mizoram hi group B-ah champion lai Karnataka, Maharashtra, Delhi, Manipur leh Railways te nen an awm. Final round hi February-March, 2024 hian Arunachal Pradesh-ah neih tur a ni a, final khuallian tur atan FIFA president Gianni Infantino chu biak fel a ni tawh.

Final round-ah hian team 12 an awm a, group A-ah inelna thlengtu Arunachal Pradesh, Meghalaya, Goa, Assam, Services leh Kerala te an awm bawk. Kum dangah chuan Santosh Trophy final round-ah hian group khat aṭangin semifinal khel turin pahnih an tling ṭhin a, kuminah chuan group khat aṭangin a sang paliin knockout stage an lut ang.

Mizoram hi coach Lalsangzuala Hmar leh manager K. Lalenghluna (Maenga) ten an ho a, October thla khan Amritsar-ah inelna an hmachhawn. Match hmasa berah Mizoram hian Services hneh lo mah se a hnu lam match liah an chak vek. Coach Sanga hote hian DNH&DD (5-0), Sikkim (1-0), Uttarakhand (1-0) leh Pondicherry (6-0) te an hneh a, match hnuhnung paliah hian goal an chhuah lo.

Santosh Trophy hi football-a National Games khel pha tur zawnna a ni a, quarterfinal khel pha chin hi nakkumah Uttarakhand-ah an zin thei ang. Kumina Goa-a National Games neih a nih khan Mizoramin football team an tir lo.