Srinagar khaw vawtah Aizawl FC fiahna

Vawiin tlai dar 2:00 hian Aizawl FC-in Real Kashmir chu an mual TRC Turf Ground, Srinagar-ah an hmachhawn dawn. Tun dinhmunah Srinagar hi 6°C te a ni a, Real Kashmir hian an mual hi an hman thiam bawk avangin inkhelh a harsa ang.

Aizawl FC coach B. Malsawmzuala chuan, "Player tawnhriat nei ṭha kan mamawh a, captain Kimkima'n tun ṭum inkhel chu min ho a ngai. Real Kashmir lakah point hlawhchhuah ngei kan tum," tiin Vanglaini a hrilh.

Champhai Kanan defender Lalchhawnkima hian Aizawl FC a luh hma season (2021-22) ah khan Real Kashmir tan hian a khel tawh a, Lalmuanawma (Munez) aiah lutin Serbian defender Ivan Maric Maric nen an inkawp ang.

Mizo club hi Srinagar an pan hma hian Rajasthan FC nen Hyderabad-ah 2-2 in an inhnehtawk a, goal hnih hi Serchhip tlangval Lalrinzuala khung ve ve a ni. Rinzuala bakah Lamzawl tlangval R. Lalthanmawia leh Champhai Zotlang tlangval Lalbiakdika te hi Aizawl FC tlarhma innghahna tur an ni thei ang.

Aizawl FC tana fimkhur ṭulna erawh Real Kashmir hi match hnuhnung pahnihah 4-0 ve vein an chak a, Hnahthial tlangval Jeremy Laldinpuia chu bul ṭantu zingah tel ṭhinin Mizo tlangval dang Lalramdinsanga Ralte an kawl bawk.