City khelmualah mangchhia nena leng tur Spurs

Premier League match 10 chauh khelh a la nih lai kha chuan ni se, Pathianni zan dar 10:00-a Manchester City-in Tottenham Hotspur an mikhual tur hi, "Inkhel hmuhnawm tur bik," tiin kan sawi ngam hial ang.

Mahse, football a ni miau a, thawnthu a danglam chak hle. Tunah chuan match 13 an khel tawh a, match hmasa 10-a tlawm nei lo Spurs chu match thum chhung a zawnin an tlawm tawh a, table-ah pangana an ni mek.

London club hian mangchhia nei chungin Pep Guardiola-a City an tlawh dawn a ni a, a hautak dawn - chutihrual chuan team pahnih inkarah point thum chauh a awm a, zanin result hian team pahnih dinhmun a sawi danglam dawrh thei dawn.

Aw thawhlehna?

Spurs tan match thum a zawna chak loh hnua City ber kher hmachhawn hi a châkawm lo ang tih a chiang. London club hi hliamin a tibuai tel a, Ange Postecoglou hnuaia an game hmuhnawm bik atana player ṭangkai James Maddison a la inhliam a, Richarlison leh Micky van de Ven pawh an chawlh a la ṭul.

Tottenham hi an ṭhat dan berin an inlan dawn lo tihna a ni a, chutihrual chuan hrem vanga an chawlh hnuah Yves Bissouma leh Cristian Romero an lo kir tawh dawn a, Pape Matar Sarr pawh inlan thei tawh tura beisei a ni.

Match hnuhnung bera Aston Villa hneh lo team ai kha chuan Spurs an ṭha tawh dawn tihna a ni a, Postecoglou-a'n thawnthu her danglam a, a naute thinlunga inrintawkna tuh turin Pathianni zanah chak a tum ang.

City an buai?

Etihad Stadium-a inkhel tur an ni a, season hmasa treble champion City rin loh an har. Mahse, tun hnaia lang chiang tak chu Pep-a team hi an tlarhnung a pawp ve tho a, he team lakah hian goal a khung theih tih hi a ni.

Premier League-a an match hnuhnung pahnihah City hi an chak zo lo a ni mai lo a, goal nga an chhuah. Chelsea khelmualah 4-4 in an inhnehtawk a, Liverpool mikhual zuiin 1-1 in an ṭin leh bawk.

Champions League-ah City hi 3-2 in RB Leipzig lakah chak zui mah se, German club lakah goal hnih an chhuah hmasa a, Pep-a'n tlarhnung buaina a la chingfel lo - tunah chingfel tawh tak maw? Pathianni zanah hriattir kan ni dawn e.