Rahul Dravid-a'n contract thar a ziak

Indian cricket team coach Rahul Dravid chuan India enkawl zel turin thutlukna a siam a, Board of Control for Cricket in India (BCCI) nen an inrem angin contract thar a ziak - a contract rei zawng hi tarlan a ni lo.

Kum 50 mi Dravid hian November 2021 aṭang khan India hi enkawl ṭanin, World Cup khelh zawh takah khan a contract a zo. Dravid hi chhuak mai tur anga sawi a awm hman a, mahse, contract thar a ziak ta zawk.

Indian cricket legend hi a contract rei zawng tarlan ni lo mah se, June 2024-a Twenty20 World Cup khelh a nih chu a thleng ngei dawn nia sawi a ni a, a contract hmasaah khan kum khatah cheng vaibelchhe 12 a hlawh - thla khatah nuai 100 a hlawh tihna a ni!

Dravid-a enkawlna hnuaiah India hi Test, ODI leh T20-ah te world number 1 an ni vek a, World Cup khelh zawh takah pawh khan group stage match zawng zawngah hnehna an chang vek. Mahse, final-ah Australia an ngam lo a, uiawm takin an tlawm.

India hian kum 2011 hnuah International Cricket Council (ICC) hnuaia khawvel huap inelnaah nomawi chawi an la nei leh lo a, T20 World Cup 2024-ah Dravid hi nomawi chawi tura beisei a ni ang.

Men in Blue hi an vanduai thei hle - 2022 T20 World Cup-ah semifinal thleng mah se, England ngam loin an tlawm a, kum 2023-a World Test Championship leh World Cup final-ah te Australia ve ve ngam loin, pahnihnaah lungawi an zir.

Dravid chuan, "Tun hnai kum hnih chhunga Team India nena kan thil tawnte hi hriatreng tlak a ni a, lawmna leh lungngaihna kan tawng ho a, hetih chhung zawnga thlawpna leh inlungrualna hi a ropui takzet.

"Kan dressing room-a boruak ṭha tak kan neihte hi ka chhuang a, World Cup zawha chona thar hmachhawn turin kan inpumpek lehnghal a ni," a ti a, India tan thil ropui zawk tih theih a inbeisei.

India hian Australia nen T20 series an khel mek a, match nga khelh turah match thum khel tawhin, India hian 2-1 in hma an hruai mek - nizan dar 7:00 khan match lina an khel a, result kan hre hman lo.

Australia nen an inkhelh zawhah South Africa an pan zui ang a, T20 match thum, ODI match thum leh Test match hnihte an khel leh ang a, South Africa-ah hian December leh January an hmang ang.

Krismas leh kumthar an mangṭha zawhah India-ah an lo kir ang a, England mikhualin Test series match nga an khel dawn a, January aṭanga March thleng a awh dawn thung.