Chamari lakah Chawnpui an par

Zote Toyota MPL10-ah Chawnpui FC chuan nimin khan Chanmari FC 2-0 in an hneh a, Lalrindika Hmar hote hi table chung berah an awm. RG Stadium-a inkhelah Chawnpui tan C. Ramnunpuia (Tea Chinzah) leh Laltluangliana ten goal khat ve ve an khung.

Phase 2 inkhel hmasa pathumah team pahnih hian point hnih ve ve chauh an hmuh avangin semifinal khel turin an dinhmun a chiang ta lo a, chak an mamawh ve ve. Chanmari FC-in chance ṭha an nei a, Lalkhawpuimawia (Mapuia) dawk ṭha mah se goal kham chungah a pet.

Chhun pachanga an khel chungin game hmuhnawm an khel a, Chanmari defender tihsual nang chingtu Tea Chinzah-in ṭha takin a la lut a, keeper Zothanmawia venah minute 41-naah goal ṭha a khung. Minute 52-naah Chawnpuiin corner kick an hmang ṭangkai a, Tluangliana'n ṭha zetin a tauh lut. Inkhelh banah Chawnpui coach Lalrindika Hmar-in corner kick aṭanga an khung dan chu training-naa an zir ang chiah a nih thu Vanglaini a hrilh.

Chanmari FC-in khawihli vanga captain Lalrinchhana Tochawng khelh theih loh an tuar a, an tlarhnung a phui tawk lo. Chawnpuiin awmze neia goal an venhim avangin Chanmari tlarhma lamin goal chance siam an harsat. Chutihrualin substitute Lalthangliana'n (AB-a) box pawn aṭangin goal ban a pet per a, Tluangliana'n goalline bul aṭangin a tauh chhuak a, R. Laldanmawia ball pet Chawnpui defender-in ṭha takin a dang.

Chawnpuiin an phu ang point thum an hlawh chhuak a, phase 2 khel ṭha tawk lo Chanmari erawhin semifinal khel turin insiamṭhat an mamawh hle. K. Malsawmkima hote vanneihna erawh an elpui Chhinga Vengin point an hmu bik lo.