Venghnuaiin Chhinga Veng an barakhaih

Zote Toyota MPL10-ah FC Venghnuaiin harhtharna an chang zel a, nimin tlai khan semifinal khelh beiseina nei Chhinga Veng FC chu 1-0 in an hneh. Goal awmchhun hi substitute Vanlalhruaia khung a ni a, man of the match-ah thlan a ni bawk.

Venghnuai hian phase 1-ah point khat chauh an hlawh chhuak a, chak hmel pawh an la hmu lo. Phase 2-ah erawh Venghnuai hian match liah hneh loh an la tawng lo a, vawi hnih an chak tawh. Chhingcows lakah hian Venghnuai hian injury time-ah chakna goal khung chauh mah se chak phu zawk an ni.

RG Stadium-a inkhelah Chhingcows captain MS Dawngliana'n chance ṭha a hlah nghal a, mah se Venghnuai lamin chance ṭha an ngah zui zawk. Jerry Lalchhanchhuaha'n Chhingcows tlarhnung a bum hnuah ṭha takin goal-ah pet mah se keeper RS Lawmzuala'n a dansak a, Republic Veng tlangval hian Jerry pet bawk chu ṭha takin a dang leh bawk.

Second half-ah Venghnuai hian penalty hmangin hmahruai theihna hun ṭha an nei a, Jessy Vanlalmuana'n a hlah. Phase 2-ah Venghnuaiin penalty vawi li an hmu tawh a, player hran vekin an pet a, an hlah vek! Chhinga Veng pawhin Lallawmsanga leh PC Lallawmkima te hmangin hun ṭha an hlah a, Dawngtea goal khung theih loh nia goal khungtu dang an nei lo.

Venghnuaiin an huaisen rah an sual chuak a, injury time-ah Lalhmunmawia (Amawia) ball pet chu Chhinga Veng keeper Lawma'n dang mah se a per chu Mahruaia'n goal-ah a chantir. Ṭantu nei ṭha Venghnuaiin hnehna an chang a, point thum an hlawhchhuahna kawngah mipui an thawh hlawk hle.