Arsenal boruak a fuh zel dawn em?

Thlasik a inṭan a, season hmasa ang bawkin Premier League hmahruaitu chu Arsenal an ni. Gunners hian eng chena rei nge hma an hruai theih ang tih chu football ngaina tute zawhna a ni mek.

Mikel Arteta naute hian zanin dar 8:30 hian EPL match khel turin Wolves an mikhual dawn a, an inkhelhna tur hi Lens an sawpna hmun Emirates Stadium ngei mai kha a ni a, an phur vanglai tak a ni.

Gunners hian league hma an hruai a ni satliah lo a, an kalkawngah hian champion lai Manchester City pawh an hneh, nikum ai chuan an huaisenin an puitling ta deuh niin a lang, chutihrualin kawng zawh tur an la neih thui em avangin an dinhmun tak hi sawi thiam a la harsa.

Ram dang ang lo takin England-ah chuan Krismas laiin EPL an khel leh dawn a, hei hi squad neih chhah a ngaih hun a ni ṭhin. Arsenal pawh Champions League khelh hmabak nei chunga an dinhmun an tifel hma hi league lamah an ṭhatpui tura beisei a ni.

Arteta chuan, "UCL-a hmabak pakhat chu kan hlen ta ngei mai, chutihrualin kan chawl thei tihna erawh a la ni lo. Football match kan khel a nih reng reng chuan hnehna chan tumin kan bei ṭhin tur a ni ang.

"Hnehna chan hi kan match lehpek atana inbuatsaihna ṭha ber chu a ni. Chutihrualin match hmabak kan ngah avangin player khelh dan erawh a inchhawk leh insiksawi a ngaihna chen chu a awm ang," a ti.

North London club hian striker Gabriel Jesus leh captain Martin Odegaard te chu hliam vang an chhawr theih loh reng hnuah an chhawr thei leh tawh a, an awm loh laia an hmun ruak luahtute an ṭha tawk bawk - coach thar duhthlan tur an awm.

Kai Havertz-a'n league leh UCL-ah a zawnin goal a khung a, zaninah pawh Wolves tlarhnung tana ven ngai zinga mi a ni dawn - Bukayo Saka leh Gabriel Martinelli te an inpeih sa bawk.

Spanish manager Arteta chuan, "A hma lam chauh ni loin an hnung lam an khel ṭha," tiin Lens an hneh hnuah a sawi. League lamah pawh tun season chhungin vawi ruk chu goal chhuah lohna an nei a, clean sheet nei tam ber an ni mek.

Arsenal boruak a ṭhat lai hian Wolves erawh an beisei anga khel hleithei rih lo an ni. Table-ah 12-na dinhmun luahin, tun hnai mai khan an sporting director Matt Hobbs chu match khat atan hrem a ni.