Barcelona vs Atletico Madrid La Liga a hmuhnawm dawn!

Kartawp La Liga-ah inkhel hmuhnawm en tur a awm dawn a, Barcelona chuan Pathianni zan dar 1:30-ah Atletico Madrid an mikhual dawn - a hmuhnawm loh ring suh.

Spanish football sawi a nih chuan rilruah Real Madrid, Barcelona leh Atletico Madrid an lo lang hmasa ber zel a, champion tur pawhin anni pathum bak rin dan thiam a harsa ṭhin.

Tun season-ah team pathum hi an inum tawk lehzual - Real Madrid-in league match 14 khelh tawhah point 35 hmuin hma an hruai mek a, tun season-a rin loh taka lo lang ve hlawl Girona nen an point hmuh zat a inang.

Barca leh Atletico hian point 31 ve ve an nei bawk - hei hian Pathianni zan inkhel a tihmuhnawm zual ang tih a chiang a, mahse, Atletico hian Real leh Barca aiin match khatin an khel tlem zawk tih hriat tel a ṭha.

Barca an buai

He thu buatsaih a nih lai hian Barca keeper inhliam Marc-Andre Ter Stegen-a'n training a la zawm lo a, German keeper tel loa Barca an inlan a nih chuan tlarhmaa Antoine Griezmann leh Álvaro Morata neitu Atletico-in an zuam sawt ang.

Barca-a beisei phak lo Griezmann hian season duhawm tak a hmang mek a, inelna hrang hrangah match 17 khelin goal 13 a khung der tawh a, Morata hian match 14 aṭangin goal 12 a khung tawh bawk - Spanish football-a striker inkawp hlauhawm ber pawl an ni mek.

Xavi-a'n player pahnih dan theih dan tur a ngaihtuah a ṭul tihna a ni a, second choice keeper Iñaki Peña-a'n rintlak a ni tih a pholanna hun remchang a ni bawk - Barca hian an league match hnuhnung berah Rayo Vallecano chu 1-1 in an inhnehtawkpui.

Mahse, Champions League-ah insiamṭha zuiin, FC Porto chu 1-0 in an hneh a, Rayo laka talbuai Pena pawh a inringtawk tawh. Champions League boruakin Barca talbuai lutuk tur a tuam dam a tih theih a, tlarhmaah Robert Lewandowski mawhphurhna a sang leh ang.

Atletico dinhmun

Las Palmas laka rin loh taka an tlawm hnuin, Atletico Madrid an insiamṭha a, league match hnih a zawna chakin, Champions League match hnih an chak bawk a, an coach Diego Simeone hoa an boruak a ṭhat vanglai tak a ni.

Kum 53 mi coach hian tun thlatir khan June 2027 thleng Atletico-a cham turin contract a ziak thar a, Spanish club hian kum 2011 aṭanga an club enkawltu hi an la ring tawk tih an pholang a, result hmanga an rinna chhanlet hi a duh dawn.

Zanina mipui mit fukna tur pakhat chu Joao Felix a ni. Kum 24 mi forward hi July 2019 khan Atletico-in pound maktaduai 113-in an la lut a, beisei a phak lo. Tun season-ah Barca-ah loan-in an kaltir a, a club a hmachhawn thei dawn.

Champion tuma inel an nih miau avangin Pathianni zan inkhel tur hi, "Point ruk inchuhna inkhel" tih ang hialin a sawi theih dawn a, Nou Camp-a Atletico ngam loh Barca-in a duh dawn lo - inkhel hmuhnawm beisei phawt mai rawh!