Napoli mualah Inter Milan

Serie A champion lai Napoli chuan na taka an nomawi kawl lai chuhpuitu an nei a, an hming chu Inter Milan an ni - Italian club ṭha pahnih hi zanin dar 1:15 hian Diego Maradona Stadium-ah an intawng ang.

Simone Inzaghi enkawl Inter Milan hian match 13 an khelh tawh chinah chuan Juventus lakah point hnihin hma an hruai a, nizan khan Old Lady an inlan avangin an dinhmun erawh a danglam hret thei.

Match khat lekah an dinhmun hi a la inthlak reng a, chuvangin chetsual a thiang lo. Napoli tan pawh nomawi humhim tur chuan chetsual a thiang tawh lo bawk.

Inter coach Inzaghi chuan, "Benfica nen Champions League kan khelh ṭum khan kan khel chhe lo, chutihrualin goal thum ngawt kan chhuah avangin insiamṭhatna lai tur kan ngah hle.

"Inkhelah chuan goal khung tam ringawt hi a tawk lo a, mahni goal venhim a pawimawh. Napoli hi goal khung thiam an ni a, chuvangin mahni inveng tak chunga kan chet a ngai dawn," tiin a sawi.

Napoli pawhin chak an tum dawn, coach thar Walter Mazzarri kaihhruaina hnuaiah phur thar viau mah se Real Madrid lakah an tlawm - Inter Milan hnuah Juventus an tum leh dawn, hmabak a hautak dawn hle a ni.