Mizoramin chakin bul an ṭan

73rd Senior National Basketball Championship chu nimin aṭang khan Ludhiana-ah khelh ṭan a ni a, Mizoram hian match hmasa berah West Bengal hmachhawnin 66-62 in an hneh. Vawiin chawhma dar 9:30 hian Meghalaya an hmachhawn leh dawn a, inkhel hi MSL club Khatla TBL Instagram account kaltlangin a en theih ang.

Mizoram aiawh hian Khatla TBL an kal a, TBL hi MSL8 champion an nih bakah tun season Season Opening Tournament leh MBBA Cup champion an ni. Mizoram coach H. Lalhruaitluanga chuan, "Chakin bul an kan ṭan a, kan lawm hle. Mizoram tan theihtawp kan chhuah dawn a, Mizo mipuite ṭawngṭaina kan mamawh tak meuh meuh a ni," tiin Vanglaini a hrilh.

Nakkum hian Uttarakhand-ah National Games khelh a ni dawn a, Mizoramin National Games-a basketball team tir tur chuan tun ṭum inelnaah team 34 zingah a sang pariat zingah tel a ngai dawn a ni.