AFC tan rawlthar duhawm Fela inlar

Aizawl FC-in I League an khelh avangin Zote Toyota MPL10-ah academy player ṭhenkhat tan khelhna hun remchang a inhawng a, I League club rawlthar H. Lalruatfela'n MPL-a inlan hmasak berah goal ropui pahnih a khung.

Durtlang North rawlthar Fela goal hnih hmangin Aizawl FC-in Mizoram Police 2-2 in an chelh a, AFC-in an ṭhat dan ber anga an khel lo chungin team ṭha Police lakah point khat an hlawh chhuak a, result ṭha a ni.

Kum 17 mi Fela hian hming chher turin hun a duh rei lo a, second 36-na lekah Nikku hnen aṭanga a ball hmuh chu box pawn aṭangin kawh zetin a pet goal. Mizoram keeper F. Lalmuanawma'n a dang thei lo.

Fela hian minute 34-naah halfway line aṭanga a khalh phei hnuah box pawn aṭangin a pet leh a, crossbar a per. Police-in R. Malsawmtluanga hmanga siphurh an sut hnuah Fela bawk hian yard 30 vel aṭangin first half injury time-ah kawh zetin a pet goal leh a, Muanawma meuhin a dan loh chuan a pet ṭha hle tihna a ni.

Second half-ah pawh Fela hian hla tak aṭangin goal-ah a pe ta, Muanawma'n nem chhuak lo se chuan goal kilah tak a lut ang. MPL vawi khat khelhna chauh ni mah se Fela a langsar a, man of the match-ah an thlang. Kum nga liam ta khan AIFF Golden Baby League (Durtlang)ah U13-ah top scorer leh best player a ni kawp tawh a, Fela'n a nun a uluk phawt chuan hmabak a nei êng hle.

RG Stadium-a inkhelah Fela langsar mah se Police erawh an tlo leh ṭhin a, ni sa hnuaiah inkhelah bul ṭan ṭha lo mah se a tawpah chak phu zawk an ni. MS-a'n siphurh sutna goal khung turin a ball pet thiamzia a pholang a, ball petu Malsawmfela pass ṭha zet pawh sawi lan ngei a ṭul bawk.

Police-in hun tawp lamah Aizawl FC an nawr bet a, penalty hlawh chhuakin MS-a'n inringtawk takin a pet lut. Injury time-ah Police-in an nawr na lehzual a, ball-in box chhungah AFC defender Lalfamkima kut per mah se penalty a pe lo. Famkima bawk hian Police captain Lalfakzuala chu a hnung aṭangin a nam a, penalty an pet chuang lo. Hun a tawp meuh chuan Police player-te leh team enkawltute an thinur hle.