Serena chak lo mah se US an tlang

Serena Williams chuan Fed Cup bika a chak kaltluang chu a chhawmnung thei lo a, American star hi chak lo mah se United States chuan Latvia 3-2 a hnehin Fed Cup Finals an lut.

Grand Slam vawi 23 champion tawh Serena hi ram leh ram hmeichhe tennis team hmanga inelnaah hian match 14 zet a chak zawn tawh, tun ṭumah erawh Anastasija Sevastova lakah 7-6 (7-5), 3-6, 7-6 (7-4) in a chak lo. Serena chak lo mah se US hian singles match dang leh doubles lamah an chak avangin an tlang tho a ni.

Kumin aṭangin Fed Cup khelh dan phung hi thlak a ni a, tun ṭuma hnehna chang ho hian April thla hian Budapest-ah Finals an khel leh ang. US bakah hian Spain, Russia, Germany, Belarus, Switzerland, Belgium, Slovakia, Australia, France leh Czech Republic te an tling tawh a, a thlengtu Hungary chu an inlan dawn bawk.