Project Vengin table mawngphah an chhuahsan

Zote Toyota MPL10-ah Project Veng FC-in Inrinni khan an elpui Electric Veng chu 4-2 in an hneh a, table mawngphah chhuahsanin pasarihnaah an awm. Semifinal khelh inchuh boruak a nung ang chiahin relegation battle boruak pawh a ṭang. Match 11 khelh zawhah FC Venghnuai (9 pts), Project Veng (9) leh Electric Veng (8) te inthlauhna hi point khat chauh a ni.

RG Stadium-a inkhelah Electric Vengin Project Veng player handball vangin penalty an hmu a, minute rukna lekah C. Lalhriatpuia'n a khung nghal. Mahse, minute hnih hnuah penalty aṭang vekin Jehova Lalthangsanga'n Project Veng siphurh a sut. Kolasib an khel ṭha zui a, penalty an hmuh dan sawisel theih deuh mah se minute 13-naa Lalnuntluanga pet goal erawh sawisel bo a ni.

Team pahnih player-te theihna a inang tawk lo a, an inhnethawk hle. Second half ṭan chiahah Electric Veng captain Hriata'n siphurh a sut a, inkhel pawh a nung phah hle. Mahse, team anga khel ṭha zawk Kolasib club-in MS Dawngzuala leh Andy Lalrinpuia te hmangin an khung belh a, 4-2 in an chak.

Injury time-ah Kolasib winger Lalfamkima leh Electric Veng defender Remlalfaka te chu hnawhchhuah a ni a, Project Vengin FK-a match hnih ngawt an chhawr thei lo tur hi channa lian tak a ni ang.