Police 'thinrim' hmaah Venghnuai 'phur'

Zote Toyota MPL10-ah vawiin tlai dar 2:30 hian FC Venghnuai leh Mizoram Police FC te an inkhel dawn. Police hian match hnuhnung berah Aizawl FC 'kim lo' lakah point khat chauh an hmu a, hun tawp lamah penalty vawi hnih an beisei thlawn avangin an thinur a, Venghnuai lakah an thinurna hrik thlak an tum ang.

Mahse, Venghnuai hi awlsam taka hneh chi an ni lo. Phase 2 bikah Venghnuai hian hneh loh an la tawng lo a, an match hnuhnung berah Chhinga Veng an hneh a, an phur lai tak a ni. MPL10-ah Venghnuai hi ṭantu nei ṭha ber an ni hrim hrim a, an fitness a ṭhat bakah thlawptu an neih ṭhat avangin Police tan pawh hneh a harsa dawn.

Malsawmfela, R. Malsawmtluanga, B. Zoramthanga (B. Sena) ten Police tan hmun pawimawh an la chang reng a, MPL10-ah player ṭha ber zinga mi la ni mah se an vanglai a liam ve ṭanah a ngaih theih. Police hian a ngheta player an la lut a nih ngawt loh chuan an neih sa ho hi chu an daih rei a rinawm tawh lo a, chuvangin MPL-a a vawi khat nan champion an tum a nih chuan kumin hi hun ṭha a ni.

Chutihrualin coach Lalbiaksanga Colney hote hi rinkai ber an ni lo a, tun dinhmunah pahnihnaah awm mek mah se team intluk tlang panga an awm avangin semifinal khel lo thei an ni zawk. Police tan nomawi thlir a la rem lo a, semifinal an luh theih nana Venghnuai hneh chu an hna hmasa tur a ni ang.