City-in a zawnin match 3-ah point an hloh
Premier League champion lai Manchester City-in Pathianni zan khan Tottenham Hotspur an mikhual a, 3-3 in an inhnehtawk. Pep Guardiola hote hian league match hnuhnung pathuma point kua hmuh theih aṭangin point thum chauh an hlawh chhuak a, Spurs an hmachhawn hma hian Chelsea (4-4) leh Liverpool (1-1) te nen an inhnehtawk tawh bawk.
International break hmain City hi Premier League-ah hmahruaitu ni mah se tunah erawh pathumnaah an tla thla a, Pep Guardiola hote hian point 30 hmuin an elpui Arsenal chu point thumin an pha lo. City hian December 6, Nilaini zan hian palina dinhmun luahtu Aston Villa chu Villa Park-ah an tlawh dawn a, point hloh leh thei dinhmunah an ding.
Goal chance a tam
Man City hian league match hnuhnung pariatah an hmelma Man United laka goal an humhim tih loh kha chu goal an chhuah vek a, Chelsea laka goal li zet an chhuah khan an tlarhnung a phui lo tih a pholang. Tun season-ah match 14 chauh an la khel chungin goal 20 ngawt an chhuah tawh.
Pathianni zanah pawh City tlarhnung a pherh a, chance ṭha hmasa hlahtu Jeremy Doku-a'n ama ball tura ngaih a hum loh avangin Son Heung-min-a'n minute rukna lekah Spurs tan a khung. Son-a'n goal ṭha bik a khung aṭanga minute thumnaah Julian Alvarez-a freekick chu an lamah a su lut a, 1-1 a ni lehnghal.
City an chungnung zui a, Erling Haaland-a'n goal ruaka a khung loh hnuah Doku-a'n crossbar leh ban a pet per a, Spurs an vannei reng lo. Phil Foden-a'n minute 31-naah Alvarez-a siamsak a khung a, Spurs tlarhnung an ṭhiat chiang hle.
City an vanduai a, Alvarez-a'n goal ban a per a, first half-ah goal hnih khung bawk mah se an chance neihzat aṭanga thlir chuan goal tam zawk khung tur an ni. Second half ṭan chiahah pawh Bernardo Silva pet chu Spurs keeper Guglielmo Vicario-a'n a dang ṭha hle.
A tawpah drama
City-in chance ṭha an hlah laiin Spurs erawh goal hmaah an hriam a, Giovani Lo Celso-a'n box pawn aṭangin minute 69-naah ṭha zetin si phurh a sut. Pep-a hoten chak ngei tumin na takin an nawr a, Rodri-a'n hun ṭha a hlah. Minute 81-naah City an vannei ta a, Haaland-a ball pek chu Jack Grealish-a'n a khung. Etihad Stadium-ah thawm a ṭha a, mualneitu lamin point thum an hlawh chhuak ngei turah an inngai. Mahse, Spurs an beidawng duh bik lo.
Hun tawp hma minute khat chiah a awm tawh tihah Brennan Johnson cross chu Dejan Kulusevski-a'n a tauh goal a, a tauh ṭhat em avangin City goalkeeper Ederson pawhin a en liam ringawt. City-in chance an insiam leh hman tho. Mahse, referee Simon Hooper a chesual. Haaland a tihtluk vangin referee hian foul ham a tum a, Norwegian striker petchhuah nghak zet mah se Grealish tana ball ṭha a ni tih hriat hnuah Simon Hooper hian 'foul' a ham. City player an thinur a, goal theihna tur a nih avangin an lungawi lo hi a awm chiah bawk.
Haaland leh a ṭhianten referee an hmin zo lo a, a pawi tur ang a pawi zo tawh. Referee-in lungawi lohna lantirtu Haaland yellow card a pe a, City leh Spurs 3-3 in an inhnehtawk. Inkhelh banah Haaland-a'n a lungawi lohna a sawi chhunzawm a, Pep Guardiola pawhin, "Referee ngei pawh kha player ni se, a chunga thil thleng ni se, a lawm bik lo ang," tiin a sawi.