Team huaisen Liverpool an chak

Liverpool-in Fulham lakah vawi hnih ngawt hma an hruai hnuin vawi thum goal an chhuah leh a, a tawpa Trent Alexander-Arnold goal hmangin an chak hram - Pathianni zan khan an mikhual Fulham chu 4-3 in an hneh.

Jurgen Klopp-a hote hi hnehna an chan avangin 'champion zia' tia sawi theih a ni a, chutihrual chuan awlsam taka chak thei an nih tel tho avangin Jurgen Klopp-a tan siamṭhat an ngaihna lai hmuh hmaih a rem lo.

Reds hian Fulham keeper Bernd Leno (own goal) leh Alexis Mac Allister hmangin vawi hnih ngawt hma an hruai a, Fulham-in Harry Wilson, Kenny Tete leh Bobby De Cordova-Reid hmanga chhangletin, Reds an talbuai hman.

A tawpah erawh team ṭha danglamna a lang a, Wataru Endo leh Alexander-Arnold ten goal khat ve ve khung ve lehin, 4-3 in Liverpool an chak a, Premier League table-ah pahnihna an ni.

Goal mawi

Liverpool tan Mohamed Salah chuan goal hmahruai a khung niah inngai mah se offside vangin pawmsak a ni lo a, minute 20-naah erawh an khung ta tho - Arnold-a freekick pet ṭha zet chuan bar a per hnuah Leno-a hnung a per leh a, goal-ah a lut.

Fulham an hnual phah lo. Minute li hnu lawkah Liverpool player hlui Wilson chuan si phurh sutna goal a rawn khung a, 1-1 a ni. Mahse, Anfield a ni miau a, Reds an zuai duh lo.

Minute 38-naah Mac Allister chuan mawi lutukin Liverpool tana a goal hmasa ber a khung ve leh a, 2-1 a ni. First half hun pek belh a ni a, Fulham an hnual lo - Tete chuan si phurh a rawn sut ve leh a, 2-2 a ni.

Liverpool-in hmahruaina hun remchang second half-ah nei zui leh mah se an chhawr lo a, Darwin Nunez chuan vawi khat crossbar tihperin, hnai set sawt aṭangin uiawm takin a pet fuh tawk lo bawk.

A tawpah a changtupa!

Nunez-a'n chance duhawm vawi hnih a hlah hnuah Liverpool hremin an awm a, minute 80-naah De Cordova-Reid chuan Fulham hmahruaina goal a khung - Anfield a reh duak a, Reds fan-ten mahni mualah ngei an tlawm dawn niin an ngai hman.

Mahse, thawnthu ziak thiam takin ngaihnawm taka thawnthu a ziak ang mai a ni a, a laihawlah lungngaihna thleng mah se a tawp khar dan erawh a tawpa a changtupa a che fuh ang mai a ni.

Minute 87-naah Wataru Endo a inlar. Japanese midfielder hian Liverpool jersey hak a phu tih pholangin, mawi zetin si phurh sutna goal a khung a, Anfield thawm chu ring tak a ni. Liverpool an beidawng lo.

Hun tawp nan minute hnih chiah a awm tawh tihah Arnold bawk a inlar a, Liverpool chherchhuah defender hian sawiselna tawk ṭhin mah se, mamawh chhanna a la ni reng tih pholangin chakna goal a khung a, Anfield-ah 4-3 in Liverpool an chak.