Inter Milan chungnung zel

Serie A hmahruaitu Inter Milan chuan champion lai Napoli 3-0 a sawp chungin an hmahruaina an sawhnghet. Inter tan hian Hakan Calhanoglu, Nicolo Barella leh Marcus Thuram ten goal khat ṭheuh an khung.

Inter coach Simone Inzaghi chuan, "Napoli hi Italy ram champion lai an ni a, an lak aṭanga point thum hlawhchhuah chu thil lawmawm bik a ni. Kan match hnuhnung paruk aṭangin tun ṭum hi khualmuala kan inkhelh vawi ngana a ni a, kan tan chuan hna hautak a ni," a ti.

Pathianni zan inkhel dangah AS Roma chuan Sassuolo 2-1 in an hneh bawk. Jose Mourinho enkawl Roma hian season bul ṭan fuh lo mah se an insiamṭha ta hle a, point 24 hmuin palina dinhmun an luah leh tawh a ni.