Man United mualah Chelsea
Zanin dar 1:45 hian Manchester United chuan Premier League khel turin Old Trafford-ah Chelsea an lo mikhual dawn, club lian pahnih hi season hmang ṭha tawk lo an ni a, a chak lo zawk tan buaina belhchhah thei tur a ni dawn.
Tun dinhmunah chuan Man United leh Blues hian champion an tum phak rih lo, chutihrualin season chawhma lam pawh a la zo lo a, an insiamṭha thei a nih chuan an chunga awmte elphak turin hun a la awm - zanin hi insiamṭha tura hun pawimawh hmasa chu a ni.
United boruak
An match hnuhnung paruk aṭanga vawi nga ngawt an chak hnuah Manchetser United hian Newcastle an ngam lo, an chak loh hnuah Erik ten Hag chuan, "Tun hma pawhin Manchester City kan hneh loh hnuin ṭha takin kan khel chhunzawm," a ti.
Dutch manager hian Magpies an ngam lohna chu insiamṭhat nan hman an tum tih a sawi a, an tan chuan Chelsea hneh hi a pawimawh hle - manager hma lam hun thlenga hril thei tur thil niin a lang bawk, thil awlsam erawh a ni bik kher lo ang.
Newcastle lakah khan tlarhnung laiah Harry Maguire leh Luke Shaw te an ding a, an nghet tawk lo. Lisandro Martinez la inhliam mah se Raphael Varane leh Victor Lindelof te chhawr theih turin an inpeih a, a siksawi hretin a rinawm.
Christian Eriksen chu duhthusamin a la dam lo, captain Bruno Fernandes chu ball semtu a nih leh a ngai dawn. Portuguese midfielder hian yellow card a hmu leh a nih chuan match khat khel lo tura hrem theih a ni dawn, chuvangin a fimkhur a ngai dawn hle.
Rasmus Hojlund a dam tawh - Denmark international striker hi minute 90 chhung khel tura a la ring zo lo a nih pawhin hun tam zawk a khelh theih tawh a rinawm a, a tharum ngahna hi Chelsea tlarhnung lam tibuai thei tur a ni ang.
Anthony Martial, Marcus Rashford leh Alejandro Garnacho te an la nei bawk a, an khelh fuh ṭum a nih chuan an ṭha tawk. A pawimawh ber erawh coach Ten Hag-a'n an ṭhat danin a khelh chhuahtir thei ang em, tih a ni.
Enzo awmna
Enzo Fernandez tan season duhawm tia sawi tur a ni lo, mahse, kartawp inkhela Brighton an hneh ṭum kha Argentine midfielder tan hun duhawm a ni a, boruak ṭha neih chhunzawm a duh dawn - a hmabak chu Manchester United tlarhnung sut hawn a ni ang.
Stamford Bridge-a inkhelah khan Fernandez hian goal hnih a khung a ni satliah lo, midfielder Conor Gallagher hnawhchhuah a ni chungin midfield a khaikhawm thei a, a daihzaizia hmutu chu Blues ṭantute an ni, khatiang bawk kha an beisei leh dawn.
Mauricio Pochettino enkawl hian kim lo chungin point thum an hmu thei tih an lantir zo chauh a, tun ṭumah erawh a tlem zawk ni chung chuan chak a harsa tawh mai thei, boruak sangah player inthunun theih a pawimawh ang.
Reece James leh Marc Cucurella ten hremna an hman zawh tawh avangin an inkhel thei dawn, chanchin lawmawm a ni ang. Hetihlai hian Ben Chilwell, Wesley Fofana, Trevoh Chalobah leh Carney Chukwuemeka te erawh an la chawl thung.
Malo Gusto, Romeo Lavia leh Christopher Nkunku te pawhin training an zawm ṭhat tawh avangin chhawr theih an ni dawn a, coach Pochettino-a'n a mamawhna lai bikah a luhtir a nih pawhin a mak lo ang, rinrawl tur erawh chuan a la hma deuh thei bawk.
Mykhailo Mudryk-a'n beisei la phak chiah lo mah se Brighton lakah penalty a hlawh chhuak a, theihna a neiin a tlan chak tih chu a hriat. Ukraine international hian Man United lakah inkhel bul a ṭan lo a nih pawhin, bench aṭanga a lut a nih chuan a hnawksak leh ang.