Project Veng tan I League club hnehna hun ṭha

I League club hmachhawn hi tualchhung football club nazawng tan tih theih a ni lo a, Project Veng erawhin hmachhawn ringawt loin hneh theihna remchang an nei. Vawiin chawhnu dar 12:00 hian RG Stadium-ah Project Veng leh Aizawl FC te an inkhel dawn a, a hmuhnawm dawn.

Zote Toyota MPL10-ah semifinal khelh tum inchuh boruak a san ang bawkin relegation battle a 'hot'. Kolasib club hian match hnuhnung berah Electric Veng FC 4-2 ngawta hnehin table mawngphah an chhuahsan a, an phur lai tak hian Aizawl FC 'kim lo' nen an inkhel ang.

September thla khan Project Veng hian Aizawl FC kim an hmachhawn a, Kolasib-a FC Venghnuai an hneh zawh hlim ni mah se I League club hi 6-0 zetin an chak. Khami ṭuma Aizawl FC tana bul ṭantu zingah K. Lalhmangaihkima leh Joel B. Lalramchhana te chauh tun ṭumah hian chhawr theihin an awm a, bench-a awm player zingah pawh H. Lalrempuia, C. Lalmuanpuia, Vanlalawmpuia leh Rohmingthanga te chauh chhawr theih an ni.

Chutihrualin I League khel tura zin ve lo senior player-te hi theihna nei sang tak vek an la ni a, zuam ngawt chu a rem lo. MPL Board-in player ziahluh belh a phalsak avangin I League-ah pawh hmun pawimawh chang thei tur Lalfelkima te an awm a, chawhrualin Project Veng player aiin tawnhriat an la nei ṭha zawk a tih theih.

Aizawl FC 'kim lo' hian Mizoram Police an chelh thei a, hemi ṭuma goal hnih khungtu H. Lalruatfela hi mipui mit fukna tur a ni a, Project Veng coach R. Lalrammawia (Patea) pawhin a en liam ngawt lo ang. Kolasib club hian midfield-ah talent nei ṭha Lalnuntluanga (Nununa) an kawl ve tho a, Jessie Lalmawizuala te hi langsar vut lo mah se team tan an ṭangkai ṭhin.

Kolasib club hi an kim bik dawn lo a, Electric Veng an hneh ṭuma hnawhchhuah Lalfamkima a khel thei lo. FK-a a awm lo a nih chuan captain Andy Lalrinpuia a pawimawh dawn a, Jehova Lalthangsanga pawh hi Aizawl FC tlarhnung tan ven uluk a ṭul ang.