Sanga kaihhruai Chhinga Veng an tho chhuak
Zote Toyota MPL10 inkhel pawimawh bikah Chhinga Vengin champion lai Chawnpui FC 2-1 in an hneh a, match 12 khelh zawhah team pahnih hian point 12 ve ve an hmu - semifinal khel tur a la chiang thei lo.
RG Stadium-a inkhelah Chhinga Veng defender K. Lalruatdika'n (Teka) minute nga lekah an lamah a tilut a, Chhingcows-in MS Dawngliana hmanga si phurh an sut hnuah second half-a Lallawmsanga solo goal hmangin hnehna an chang.
A goal hma
MPL10 hi chhun pachanga an khelh ṭhin avangin match hmasa zawk hi an khel a dul deuh ṭhin. Niminah erawh zing lamah ruah a sur a, chhun lamah ruah tla tawh loin ni sa chuang si loin khua a dul a, RG Stadium a vawt ṭha hle.
Khawvawt hian player-te thahrui a pe zawk a, inkhel pawh a tir aṭangin a nung ṭha hle. Chawnpuiin minute nganaah an chance ṭha hmasa an khung loah inngai mah se an vannei a, buai nuaih karah Teka'n an lamah a tilut.
1st Bn MAP Ground-a an intawn hmasak ṭumin Chawnpui hian 2-1 in hnehna an chang tawh a, Lalrindika Hmar hote hian point thum an hmuh leh theih chuan semifinal lut tur an ni. Mahse, box chhungah K. Lalrosanga a fimkhur tawk loh avangin penalty a chawi. Chhingcows captain Dawngtea rawn pen chhuakin minute 10-na lekah si phurh a sut.
An intluk tawk
Coach ṭha Rindika leh Mizoram team enkawltu Lalsangzuala Hmar inbeihna a ni a, boruakin a zir bawk avangin inkhel a hmuhnawm hle. Chawnpui an khel ṭha hret a, mual laiah Lalruatfela (RF-a) leh Peter Lalrinhlua te an ṭangkai.
Chhinga Veng aiin Chawnpuiin goal khungna chance pawh an nei ṭha zawk a, Tea Chinzah-in a hun ṭha neih chu goal zawnah a tauh thei lo. Laltluangliana leh Tea Chinzah te an inthlawp ṭha a, mual ding lam aṭangin Chhinga Veng tlarhnung an ṭhiat teuh ṭhin hle.
Chhingcows lamin midfielder Lalrohlua leh Lalnunzira te damlohna vanga an chhawr theih loh avangin hliam tenau nei Johny Lalremruata'n inkhel bul a ṭan a, Serchhip tlangval hi mual laiah a thawkrim hle. First half-ah Chhinga Vengin chance ṭha an insiamthei meuh lo a, chutihrualin captain Dawngtea theihna thlirin box pawna aṭanga a pet fuh tawk lo chu hun ṭha bawhpelhah a ngaih theih.
A hun takah LS-a
Second half-ah Chhinga Veng an rawn insiamṭha hret a, mual dinglama tlan Lallawmsanga chu result tidanglamtu a ni. Minute 59-naah LS-a hian mual dinglam aṭanga a lakluh hnuah pet mai loin Chawnpui defender Lalruatfela leh Lalhmangaihsanga te inkarah a khalh lut a, keeper John Lalruatfela dan theih loin goal tawih zet a khung zui.
LS-a hi a khel ṭha chhunzawm a, counter attack tura tlan chhuak tam Tluangliana'n hmun ruakah a rawn chhu chat chat thei a, Chhingcows inkhel a nun phah hle. Goal erawh hmuh belh tur a awm lo a, hun tawp lamah Chawnpui goal bawh a na ta thung.
Hun pek belhah Chhingcows keeper RS Lallawmzuala'n box pawn aṭanga a pen chhuah avangin freekick a chawi a, Chawnpui striker David Lalchhuanawma'n hun ṭha bik hi wall pet per nan a hmang. Chhingcows-in an nawr let zui a, goalkeeper rawn chhuak hmutu Johny-a'n goal-ah pet mah se goal pawn chiahah a kal. Goal dang luh belh loin 2-1 in inkhel a tawp.