Dampuia hnuaiah Chanmari FC khel ṭan dawn

Zote Toyota MPL10-ah vawiin tlai dar 2:30 hian Chanmari FC leh Electric Veng FC te an inkhel dawn a, Chanmarians-in Laldampuia hnuaia match an khelh hmasak berna tur a ni.

Chanmari FC hian match hnuhnung berah Chawnpui FC an hneh lo a, phase 2 bikah match li aṭanga point hnih chiah an hmuh avangin coach K. Malsawmkima nen an inṭhen. Mala hnuaia assistant coach hna chelhtu Dampuia chungah mawhphurhna a tla a, Electric Veng lakah point thum hmuh nghal an tum ang.

MPL10-ah Chanmari hian champion tumin player ṭha an senglut a, kil tinah player ṭha an kawl. Position tinah player tawnhriat nei ṭhain an uap a, goalkeeper-ah Zothanmawia awmin defender-ah Mizoram captain Lalrinchhana Tochhawng, midfield-ah R. Laldanmawia (winger) leh striker-ah Lalkhawpuimawia (Mapuia) te an awm thei a, player an nei ṭha.

Hei vang tak hian Chanmari FC enkawltute pawhin coach-te chungah an beiseina a sang a, tun dinhmunah pathumna la awm mah se National Games-a Mizoram gold medal lakpui tawhtu coach Mala an ban phah. Inkhelh ṭan hma hauhin Dampuia tan pressure a awm ṭan nghal dawn a, player ṭha a ngah avangin player thlan aṭangin hna a tlin nghal dawn.

Electric Veng nen an inkhelh hmasak ṭum khan player tawnhriat nei ṭha; Mapuia, Danmawia leh Lalnuntluanga ten goal an khung a, 3-1 in Chanmari an chak. Tun ṭumah pawh hian Chanmari hi chak tura rinkai an ni a, mah se tun hnaiah goal khung an harsat a, point thum saa dah a rem lo.

Electric Veng pawhin phase 2 an hmang ṭha lo a, parukna nia phase 1 khar kha table tawp berah an awm tawh. Hrem vanga match hnuhnung ber khel thei lo H. Zawnhmingthanga a rawn kir dawn a, hnehna an chan theih nan captain C. Lalhriatpuia'n a club hlui Chanmari lakah a theihna lantir a ṭul dawn. Mahse, Electric Veng tlarhnung a phui lo a, hrem vangin Remlalfaka khel thei lo bawk nen Chanmari tlarhma dan chah chu a harsa khawp ang.