Manchester City thubuai siamsak

England rama football thuneitu sang ber Football Association (FA) chuan player thunun tawk loh avangin Manchester City chu thubuai an siamsak a, an thubuai hi December 7, Ningani thleng khinlet theihna hun an nei ang.

Premier League champion hi kartawp inkhelah Tottenham Hotspur nen 3-3 in an inhnehtawk, hun tawp dawnah referee Simon Hooper-a'n an beisei angin thutlukna a siam lo, hei vang hian Man City player ten Hooper an hual a, striker Erling Haaland chuan hmai chhanah na takin a au khum.

FA chuan thuchhuah siamin, "Zah lo leh mawi lo takin referee Simon Hooper chu chet khum a ni a, hetiang thil hi pawm zam theih a ni lo," an ti a, an khinletnaah thiam loh an chang a nih chuan hrem zui tur an ni dawn.

Kumin February thla khan Man City hi Arsenal nen an inkhelh ṭumin an lo che mawi lo tawh bawk a, an chet dan chhui chiang tura din chuan £75,000 an lo chawitir tawh bawk a ni.

Pep Guardiola naute hian Spurs laka point hnih an hloh avangin league match 14 aṭangin point 30 an nei a, hmahruaitu Arsenal an phak lohna chu point thum a ni, an chungah point 31 neitu Liverpool an awm tel bawk.

Nizan khan Gunners an inlan a, an chak a nih chuan an inthlauhna hi a zau belh thei. Zanin dar 1:45 hian Citizens hian Aston Villa khel turin Villa Park an lenchilh dawn, attacking game khel thiam pahnih intawng hi a hmuhnawm khawp ang.