Nadal lo kirna tur Brisbane

Rafael Nadal chu kum khat deuh thaw inkhel loa a awm hnuin tennis court-ah a lo kir leh ngei dawn, season thar hian Brisbane International-ah a inlan dawn tih a sawi chiang a, a tan hun hnuhnung a ni nghal zel tawh ang.

Australian Open 2023 khan Nadal hian hliam a tuar a, a hnu lamah a inkhel chhunzawm leh tawh lo. French Open an khelh dawn khan chanchinbumite a kawm a, a tan kum 2024 hi hun hnuhnung a nih tur a sawi.

Tun season kal lai a zo a, tunah chuan season thar hman dan tur an thlir ta. Kum 37 mi Nadal chuan, "Kum khat ka chawlh hnuah, tunah chuan lo kir lehna hun a ni ta. January thlatir hian Brisbane-ah kan inhmu dawn nia," tiin social media lamah a tarlang.

Brisbane International hi Nadal tan Australian Open inbuatsaihna a ni ang. Season khat chhunga Grand Slam hmasa ber Austrlian Open-ah hian kum 2009 leh 2022 te khan Nadal hi a lo champion tawh, season tharah a vawi thum nan a tum dawn a ni.

Spanish tlangval Nadal hian Grand Slam nomawi 22 a chawi tawh a, major title la hnem ber a ni ṭhin. Hliam vanga a inkhelh theih loh karah Novak Djokovic chuan nomawi 24 a lo la hman tawh, a tan um phak a harsa tawhin a rinawm - thil theih loh erawh a ni lo thung.