Table chung berah 5 Star Police

Zote Toyota MPL10 round 12 inkhel zawha hmahruaitu chu Mizoram Police an ni a, vawiina inkhel result pawhin Lalbiaksanga Colney leh a hote dinhmun hi an tidanglam tawh lo ang. Police-in Aizawl FC kim lo lakah point khat chauh hlawh chhuak mah se niminah erawh an theihna tak an lantir a, phase 2-a che ṭha FC Venghnuai chu 5-2 in an sawp.

Police leh Venghnuai inkhelah hian goal a lut tam a, goal chance a tam a, inkhel a nung ṭha hle. BS-a hote hi chiang takin chak mah se goalkeeper F. Lalmuanawma hnathawh hmuh hmaih theih a ni lo a, Mizoram keeper Muanawma hian inkhel ṭantirh lamah C. Ngurnuntluanga leh Jerry Lalchhanchhuaha te goal khung tur chu ṭha takin a dansak.

Venghnuai an khel chhe lo a, an keeper Lallawmkima khelh ṭhat ṭum a ni lo. Minute 32-naah R. Malsawmkima'n hla takin aṭangin freekick a pet goal a, Lawma'n a tihtur a ti tawk lo. First half tawp hmain Malsawmfela leh Lalbiakhlua te thawhrah sengin F. Lallawmkima'n a khung belh a, keeper Lawma'n Biaktea ball pet a hup theih loh vangah a ngaih theih.

Second half-ah Police bawkin inkhel bul an ṭan ṭha a, MS-a'n box pawn aṭnagin mawi zetin a pet goal. Mizoram midfielder MS-a hian freekick aṭangin hattrick siam theihna remchang a nei a, Lalbiakhlua (Hlutea) a kian. A phu ang ngeiin man of the match-ah erawh thlan a ni tho.

Police-in goal thum an khung hnuah keeper Muanawma a inthlahdah a, a tihsual zar zoin J Lalbiakliana'n Venghnuai tan si phurh a sut ṭhen. Venghnuai an phur thar a, goal chance pawh an ngah nghal a, Eric Remruatpuia Chhangte-in goal ruaka a khung loh te chu a ui khawp ang.

A tawpah erawh team ṭha zawk leh player nei ṭha zawk danglamna a lang a, rawlthar duhawm Michael Lalbiaksanga goal ṭha zet leh Lalbiakhlua (Hlutea) hmangin Police-in an khung belh. Police tan Lawma a thawkrim a, goal khat aia tam khung pawh phu mah se a vanneih ṭum a ni lo. Injury time-ah Venghnuai captain C. Ramdinmawia'n freekick aṭangin a khung belh a, result erawh a tidanglam pha lo.

Police coach Lalbiaksanga Colney chuan, "Game structure anga kan khel chhuak thei kha ka lawm. Zir anga khelh hi a har ber a ni a, Venghnuai laka kan khelh dan kha sawisel tur ka hre lo. Chutihrualin goal kan chhuah dan erawh inenfiah a ngai, goalkeeper Muanawma a inenfiah a ngai," tiin Vanglaini a hrilh.