Sheffield khelmualah Liverpool an leng dawn

Fulham laka hnehna chang zo hlim Liverpool chu zanin dar 1:00 hian Premier League match khel turin an inlan lehnghal dawn a, khualmualah table mawngphah luah mektu Sheffield United an lenchilh ang.

Reds hian Inrinni zanah match an neih lehnghal dawn avangin coach Jurgen Klopp-a'n player ṭhenkhat hahdamtir a thlang a nih pawhin thil awm tak a ni dawn a, Sheffield khelmualah hnehna chan inring chungin an leng dawn.

Chutihrualin Liverpool hi tun hnaiah an insiamṭha angin lang mah se, an tlarhnung hi Klopp-a'n duhthusamin a la rem phui tawk lo tih a lang a, chumi tifiahtu chu an league match hnuhnung bera Fulham laka goal thum an chhuah kha a ni.

Hliam ngah Liverpool

Liverpool damdawi in a la lun reng a, Alisson Becker (malpui), Diogo Jota (tihrawl), Andrew Robertson (dar), Thiago Alcantara (khel bawr) leh Stefan Bajcetic (chawn) te chu Jurgen Klopp-a'n hliam vangin a la chhawr thei lo mek.

Hetihlai hian Ibrahima Konate a dam chiang leh tawh a, zawhna awm zawk chu Jurgen Klopp-a'n a neih ṭhat ber thawhchhuahpui ṭul a ti kher ang em, tih a ni zawk - tlarhnungah Konstantinos Tsimikas aia Joe Gomez a lut a nih pawhin a mak lo ang.

Curtis Jones leh Cody Gakpo te pawhin bul ṭan an inbeisei leh tawh ngei ang a, Mohamed Salah hi hahdam aia inkhelh zel duh mi a nih avangin bul a ṭan a rinawm a, Luis Diaz a la awm bawk - tun season-a goal 39 chhuah tawh Sheffield tan a huphurhawm khawp ang.

Coach tel loin?

Sheffield United-in Premier League table-a pahnihna ni mek Liverpool an mikhual dawn a, boruak ṭha an mamawh tehlul nen, he thu buatsaih a nih lai hian coach Paul Heckingbottom ban thei dinhmunah an ding - i chhiar meuh chuan an inban fel tawh hial ang.

Blades hian Inrinni zan khan an elpui Burnley chu 5-0 ngawtin an ngam lo a, match 14 an khelh tawh aṭanga vawi 11 tlawmin, point nga chiah an nei a, an tiatpui nia an ngaih Burnley laka an tlawmna zat hian Sheffield thuneitu lam a titlawmngai niin a lang.

November 2021 khan Heckingbottom hi Sheffield hian an manager nghet ni turin an la lut a, season hmasaah khan Championship-ah pahnihna nihpuiin Premier League a hruai thleng - mahse, tunah erawh ban a ni dawn a, a tel loin Sheffield-in Liverpool an mikhual dawn.