Premier League-in sum an hmu hnem dawn

Football khawvela league ngaihven hlawh ber Premier League chuan sum hmuhna hnar ṭha tak a nei leh a, Sky leh TNT Sports te nen UK-a Premier League pekchhuah manah inremna siamin, pound tluklehdingawn 6.7-in an inrem.

Sky leh TNT hian season khata match 270 thleng live turin UK bika Premier League chhuahna man hi an lei a, 2025-26 season aṭanga hman ṭan tur niin, kum li chhung a awh ang.

UK-a Premier League television rights hi package ngaah ṭhen niin, Sky chuan package li ngawt an chang a, a tlem berah match 215 an chhuah thei dawn tihna a ni a, heng zingah hian Inrinni leh Pathianni zan bakah Thawhṭanni leh Zirtawpni zana match chhuah theihna a tel a, kar laihawl inkhel round thum an chang bawk.

TNT lam hian a tlem berah match 52 an chhuah ve thei dawn thung a, anni hian Inrinni zan match ṭhenkhat leh kar laihawl inkhel round hnih an chang ang. Sky Sports lam hian season tina match tawp ber, fixture 10-te chu a chhuah vek dawn bawk a ni.

Tuna Premier League thawhpui zinga mi, season khata match 20 chhuah ve ṭhin Amazon chu Premier League deal tharah hian an tel lo. Premier League chuan thuchhuah siamin, an inremna chu an deal neih lai aṭanga tehin 4% a a san thu an sawi a, "Kum 2029 thleng chu professional club-te pawh thlamuang takin an kal theih phah dawn a ni," an ti.

Premier League hian UK bik atana television rights an kalpui mek hi £5tld man a ni a, season thum chhung atana tih a ni a, mahse, Covid-19 avangin kum khat dang atan pawhsei a ni.