Chak nei lo Mumbai City

Indian Super League club Mumbai City chuan AFC Champions League-a match ruk an khelhah chak nei miah loin Asian football-a club inelna sang ber an mangṭha a, Thawhṭanni zan khan an match hnuhnung berah Navbahor chu 2-1 in an ngam lo.

Mumbai tan hian Abdenasser El Khayati chuan minute 15-na lekah goal hmahruai a khung a, mahni muala khel Mumbai hian point thum nena Champions League khar ve ngei an inbeisei hman.

Mahse, Uzbekistan club tan Jamshid Iskanderov chuan minute 29-naah si phurh sutna goal a khung a, first half hun pek belhah Jovan Dokic chuan chakna goal a khung zui bawk.

Mumbai tan midfielder Lalengmawia Ralte (Apuia) chu inkhel bul ṭantir a ni a, Lallianzuala Chhangte chu hahdamna hun pek zet ni mah se minute 75-naah bench aṭanga luhtir a ni.