A chunga berah Djokovic

Association of Tennis Professionals (ATP) ranking thar berah Novak Djokovic chu a chung berah a awm a, Serbian star hian world number 1 ni chungin a vawi riat nan kum tawp a hmang dawn - ani aia record nei ṭha an awm lo.

Kum 36 mi ni tawh mah se Djokovic hi player dang chunga leng a la ni, tun season chhungin Australian Open, French Open leh US Open nomawi a chawi, inelna lian pali zinga pakhat Wimbledon title erawh a la ta chiah lo, a sulhnu erawh a nep lo takzet.

Serbian star hian season khar dawnah ATP Finals champion nih tum leh mah se a hlawhtling ta chiah lo a, an ram tana Davis Cup lak a tumna pawh a hlawhchham rih. Mimal inelna lamah erawh sulhnu a hnutchhiah ṭha hle thung.

Djokovic hnuaiah hian tunlai rawlthar ṭha Carlos Alcaraz a awm. Spanish player hian tun season atan Wimbledon title a la, grass court inelna lian leh hautakah hian Djokovic a hneh, season tharah pawh anni pahnih bawk hi inel chhunzawm leh tur an ni dawn.