Sunderland-in coach Mowbray an ban

Championship club Sunderland chuan coach Tony Mowbray chu thla 15 an inhrawn hman tihin a hna aṭangin an ban a, an league match hnuhnung pakuaah vawi hnih chiah an chak avangin coach Mowbray ban chu buaina chinfel dan ṭha ber nia an hriat vang a ni.

Kum 60 mi Mowbray hian nikum August aṭang khan Black Cats enkawl hna hi a ṭan a, mahse, an beisei angin an thawk ho zel thei dawn ta lo.

Sunderland sporting director Kristjaan Speakman chuan, "Thutlukna siam harsa tak a ni a, mahse, kan hmachhawp leh ruahmanna te a hlawhtlin ngei theih nana ke pen zel kan duh avangin tun hi he thutlukna siamna hun ṭha niah kan ngai si a ni.

"Tunah chuan Mowbray thlaktu tur ṭha tak zawng turin theihtawp kan chhuah dawn a, coach kan zawn chhung zawng coaching team leh player-te chu kan thlawp zel dawn a ni," tiin thuchhuah an siam.