Kluivert-a'n club a chhuahsan

Dutch football legend Patrick Kluivert chu a club enkawl mek Turkish Super Lig club Adana Demirspor nen inhriatthiam tawnnain an inṭhen a, June thla khan inla lut chauh mah se kum a tawp hmain an inṭhen leh ta a ni.

Player a nih laia Ajax leh Barcelona tana hming chher tak Kluivert hian Turkish club hi match 20 kaihruai hmanin, vawi kua hnehna a chanpui a, vawi ruk an khingpui inhnehtawkpuiin, vawi nga an tlawm.

Adana Demirspor hi an match hnuhnung parukah vawi khat chiah an chak a, Turkish Super Lig-ah pangana an ni mek bawk. Club chuan thuchhuah siamin, "Club tana an hnathawh avangin Kluivert leh a staff-te chungah lawmthu kan sawi a, a hun lo kal zel tur atan duhsakna kan hlan a ni," an ti.

Kum 47 mi Kluivert hian inkhelh a chawlhsan hnuah Curaçao national team lo enkawl tawhin, FC Twente reserve team a lo enkawl tawh bawk a, AZ Alkmaar, Brisbane Roar, Netherlands leh Cameroon-ah te assistant coach a lo ni tawh bawk.