Mizoram vawi khat an chak

Board of Control for Cricket in India (BCCI) hnuaia inelna 2023–24 Vijay Hazare Trophy-ah Mizoram chuan nimin khan an group match hnuhnung ber an khel a, an khingpui Karnataka lakah wicket rukin an chak lo.

Mizoram hi Group C-ah an awm a, match vawi sarih an khelh zingah hian Bihar an hneh. Bihar lakah hian run 57-in hnehna an chang a, match dangah chak lo mah se Cricket Association of Mizoram team tan chuan chanchin lawmawm a ni phak tho ang.

Narendra Modi Stadium, Moreta, Ahmedabad-a inelna neih Vijay Hazare Trophy hi over 50 (One Day) a khelh a ni. Bihar an tum ṭum hian Mizoram hian bat hmasain over 50 aṭangin run 258 siamin wicket riat an hloh.

Mizoram fast bowler Mohit Jangra chu run siam hnem ber niin out loin run 91 a siam a, Agni Chopra chuan run 48 siam vein tualchhung player Jehu Anderson chuan run 36 a vaw chhuak ve bawk a ni.

Bihar lam target um hi a tirah an che sual nghal a, Mohit Jangra chuan over khat a vawm naah mi pathum vawm out nghalin Mizoram an che ṭha, ani hian wicket li lain Remruatdika Ralte chuan mi panga (5) a vawm out ve leh bawk. B. Lalnunfela chuan wicket khat a la ve bawk a, Mizoram hian Bihar chu run 201 chauh siamtirin an vawm out vek a ni.