Serena Williams a chak lo
Champion lai Serena Wil-liams chu Miami Open fourth round aṭangin Svetlana Kuznetsova hneh loin a tla. Thawhṭanni a inkhelah kum 34-a upa Serena hi seeded 15-na Kuznetsova lakah 6-7, 6-1, 6-2 in a chak lo a ni.
World number 1 Serena hi Miami Open-ah hian vawi riat a champion tawh a, kuminah erawh a champion nomawi a humhim thei dawn ta lo a ni. Miami-ah hian kum 2012 hnua a chak loh lehna hmasa ber a ni nge nghe. American star hi khawvela ṭha bera ngaih la ni mah se nikum August thlaa Cin-cinnati-a a career title 69-na a lak hnuah a la champion leh lo.
Russian star Kuznetsova hian unforced errors vawi 15 chauh neiin a khelh ṭhat ni a tawn bakah Serena (55 unforced errors) khelh chhiat ni a tawng fuh. Serena hian a service ṭhat hmang ṭangkaiin vawi 13 ngawt ace siam thei mah se double faults vawi kua a neih bakah a service hi vawi ruk ngawt a hum zo lo!
Grand Slam vawi 21 cham-pion tawh Serena chuan, "Kuz-netsova khan a khel ṭha em em a, tun hmain khatiang ang em ema ṭha khan a la khel chhuah ngai pawh ka hre lo zawk hial," tiin a khingpui nu chuan chak phu khawp a khelh ṭhat thu a sawi.
A vanglai hun a liam tia an sawina chungchang chhangin Serena chuan, "Ka theihna zawng zawngin chak tumin ka beia, mahse ka chak zo lo. Inkhelh zawng zawngah chak vek theih a ni bik ngai lo. Tuna ka khelh dan aṭanga hian ka dinhmun tur zawng zawng teh a la hun loin ka hria," tiin hmalam hun a eng zawngin a thlir lui hram hram.
Kum 30-a upa Kuznetsova hian kum 10 liamta khan Key Biscayne-ah hian hlawhtlinna a lo chang tawh mah se tun ṭum hi kum 2009 hnua quarterfinal a luh lehna hmasa ber a ni.
Amah ṭantute hmaah Kuz-net-sova chuan, "Ka kum a upa deuh tawh nain he hmuna inkhelh hi chu nuam ka la ti reng. Ka khelh ṭhat avang leh hnehna ka chan avangin ka hlim takzet a ni," tiin a sawi. Tukin dar 5 khan quarterfinal-ah Kuznetsova hian Ekaterina Makarova a hmachhawn leh a ni.
Inkhel dang
Inkhel dangah seeded pa-thumna Agnieszka Radwanska chu seeded 19-na Timea Bacsinszky lakah darkar hnih leh minute hnih chhungin 2-6, 6-4, 6-2 in a tlawm. Kuminah Radwanska hi a khel ṭha tluang ang reng viau a, match 21 a khelh tawh aṭanga vawi li a chak lohna chiah a ni.
British hmeichhe zinga a hmasa ber ni turin Johanna Konta chuan Monica Niculescu hnehin Miami Open-ah hian quarterfinal a lut ve bawk. Britain number 1 Konta hian 6-2, 6-2 in hnehna a chang.
World number 5 Simona Halep chuan Britain number 2 Heather Watson chu 6-3, 6-4 in a hneh ve thung a ni. Nizan khan quarterfinal hi khelh chhunzawm nghal niin Halep leh Bacsinszky an inhmachhawn leh a result kan hre hman lo thung.