Turan-a'n Arsenal a kap

Arda Turan chuan Barcelona tana khel tur chuan player ṭha bik nih a ngaih thu leh Arsenal-a khel tur chuan a ṭha van-tlang nih a tawka a hriat thu a sawi.

Turkey captain hian nikum nipui lai khan Atletico Madrid aṭangin Barca hi a zawm a, kha tih lai khan Catalan club hi transfer chungchanga hrem lai an nih avangin Turan hian kumin January thla aṭang chauh khan a club thar tan a inlan.

Kum 29-a upa Turan chuan, "Ka inkhelh dan phungah awlsam takin hnai te tea ball inpek kual leh a hunah tharum ka hmang thei. A bakah fing leh ṭha takin ka khel chhuak thei, Barcelona tana khel tur chuan ka sawi tak anga player ṭha bik nih a ngai a ni," a ti.

Gunners kap zuiin, "A vantlang anga ṭha-in ka khel thei a nih chuan Arsenal tan khel turin ka tling tawk," tiin North London club chu khawvela ṭha ber nen an inkar a hlat thu a sawi.

Arsenal hian world class player Mesut Ozil leh Alexis Sanchez te nei mah se tun season-ah nomawi beisei tur pakhat bak an nei tawh lo a, an beisei awmchhun league-ah pawh hmahruaitu Lei-cester City chu point 11 zetin an phak lo. Hetihlai hian Barcelona erawhin La Liga, Copa del Rey leh Champions League nomawi chawi thei din-hmunah an la ding mek.

Atletico Madrid mid-fielder hlui chuan a teammate Lionel Messi fak tel zauhin, "Leo hi chu mi daglam bik a ni a, a ball ken a nghetin a thunun thei em em a, a che rangin a tlan chak mai bakah a fing em em a ni," tiin Barca thiampuipa chu a fak uar hle.

Turan hian Barca tan match 12 khel tawhin goal hnih a khung tawh a, Turkey tan match 87 a khelh tawh aṭangin goal 16 a khung tawh bawk.