TR Kohli Memorial ṭan a ni

Nimin khan Mizoram Table Tennis Hall, Mission Veng-ah TR Kohli Memorial XXIX State & Inter District Championship 2015-16 chu khelh ṭan a ni.

Tournament ṭan ni hian nikum chhunga National leh International level a Mizoram tihmingṭhatu player 11 leh coach pahnih bakah manager pakhatte hnenah chawimawina hlan niin India mipa rank number 12 nilai Lalrinpuia leh Sub-Junior rank number 3 nilai Jeho Himnakulhpuingheta te pawh an tel.

Nikum November 24-29 khan 77th Junior and Youth National & Inter State Championship chu Dharamshala, Himachal Pradesh-ah neih a ni a, Mizoram aiawha kal Maubawk rawlthar Rinpuia chuan Manav Thakkar chu 4-1 a hnehin a champion a. Mizo zingah hetiang dinhmun thleng thei hmasa ber a ni nghe nghe.

Mizoram Table Tennis Association buat-saih he inelnaah hian district pasarih aṭangin player 250 vel zet an fuan khawm a, category 19-ah inelna hi neih niin April 1, Zirtawpni hian zawh tura ruahman a ni.