MSL semifinal boruak a nung

Tuikual South leh Mission Veng Vikings ten Ningani zan hian Mizoram Super League Season 2 semifinal game 2 an khel dawn. MSL Board thu-tlukna vangin semifinal boruak a ṭang ṭha tawh hle.

Semifinal game 1-ah Tuikual South-in Mission Veng Vikings chu 77-62 in an hneh a, quarter tawp bera buaina chhuah vangin player pathum leh coach hrem an ni.

Hremna chu

March 25, Zirtawpni khan MSL Board chuan buainaa in-hnamhnawih player-te hremna an tihchhuak a, an thutlukna chu a hnuaia a tarlan ang hi a ni.

• Mission Veng Vikings guard Lalnunpuia chu tharum thawh avangin match thum khel thei lo tura hrem a ni a, Rs 2,000 chawitir a ni.

• Tuikual South guard Hming-mawizuala chuan tharum thawh (match hnih) vang leh ejected a nih hnua chair a pet (match khat) avangin match thum tho an hrem a, Rs 2,000 chawitir a ni bawk.

• Tuikual South coach KC Lalliantluanga'n buaina chhuah hnuah insum zo loin match official lakah
ṭawngkam ṭha lo a hman bakah mawi lo taka a chet avangin match li team en-kawl thei lo tura hrem a ni a, Rs 2,000 chawitir a ni.

• Tuikual South center MS Dawngzela Chenkual chu court chhungah buaina ṭhelh tum si loa kut thawh zawnga a chet avangin match khat khel thei lo tura hrem a ni a, Rs 500 chawitir a ni.

Hremna sawifiahna

Vanglainiah a hnuaia tarlan ang hian buaina chungchang hi report a ni.

Quarter tawp ber an khel a, minute 6:54 chiah a awm tawh tihin Vikings guard Lalnunpuia chuan mawi lo takin Hmingmawizuala kut a thlak a, player pahnih hi eject an ni a. Referee thutluknaa lawm lo Tuikual South coach KC-a eject a ni bawk.

A lan dan mai chuan Vikings guard Nuna hi bul ṭantu niin a lang a, Tuikual South guard Mawizuala nena hremna inang hi a awm lo niin a lang.

Hemi chungchangah hian Vanglaini palai chuan MBBA disciplinary committee secretary Lalmalsawma Khiangte a kawm. Sawma chuan an hrem chhan sawiin, "Report-ah chuan Hming-mawizuala'n buaina chhuah hma khan a nghawk a, Nuna che mawi lo zui mah se Mawizuala hian match hnih tal hrem hi a phu a ni. Match thum an hrem ve chhan chu chair a pet vang kha a ni," tiin a sawifiah.

Vikings lam tan lawmna tur a ni bik lo. Buaina chhuah lai hian Tuikual South bench-a ṭhu tam zawkin (an vaiin?) buaina lam an pan a, hetiang vang hian Zarkawt BCA leh Mission Veng Vikings inkhelh ṭumin player pathum hrem ni mah se MBBA hian Tuikual South player pakhat chiah a hrem lawi si.

MBBA disciplinary com-mittee secretary Sawma chuan, "Tuikual South player-te khan an ṭhutna an chhuahsan ngei a, amaherawhchu buaina ṭhelh tumte an nih avangin hrem vek a rem lo. Chhuak lo se chuan buaina lian zawk a thleng thei a ni," tiin an hremna kalhmang a sawifiah.

Hremna na lo?

Tuikual South leh Mission Veng Vikings tan hremna hi na ve ve a, MBBA-in an sawifiah an tum zual pawh leh an hrethiam lo ang. Amaherawhchu thlirna dang aṭang chuan hremna hi na lo!

MBBA hian tun hmain an hnuaia player-te na tak takin an lo hrem tawh ṭhin a, chhan ho lam tak vanga ni 365 khel thei lo tura hriam hial an nei tawh. Heng player-te tawrh dan aṭanga thlir chuan Tuikual South leh Vikings hi an hremna dawnah hian lawm tur an ni.