Bale tel lohna Wales chak lo
Khawvela footballer manto ber Gareth Bale leh Aaron Ram-sey te tel lohna Wales chuan an muala Northern Ire-land an draw hnuah Thawhṭanni zan khan Kiev-ah Ukraine an hneh lo.
NSC Olimpiyskiy-ah An-driy Yarmolenko-a'n minute 28-naah inkhela goal awmchhun a khung a, ram tana a vawi khat khelhnaah midfielder Viktor Kovalenko a che ṭha bawk. Ukraine hian hnehna chang mah se Euro 2016-a result ṭha neih tur em chuan fitness leh team thawhhona kawngah hma-sawnna tur an la ngah hle.
Wales lam
FIFA ranking-ah Wales hi 17-naah an awm mek a, an ram history-a a vawi khatna atan European Championship khel turin an inpet tling a, 1958 FIFA World Cup quarterfinal an thlen hnua inelna lian tham an khelh lehna hmasa ber a ni.
Wales hian Euro khel tur-a an tlin hnuah an match hnuhnung paruk aṭangin vawi khat chiah hnehna an chang. Chris Coleman a naute hian Andorra hneh mah se Bosnia-Herzegovina leh Netherlands an hneh loh bakah Israel leh Northern Ireland te an draw a, an match hnuhnung berah Ukraine an hneh lo.
Swansea-a piang, kum 45-a upa Coleman chuan, "Hun rei tak a ta mumang rama kan lo suangtuah ṭhin hun kan thleng dawn a, tun hnaia kan result
ṭhenkhat vanga kan chiai mai nia lang hi a dik lo. Thil hi a ṭha lam hawi zawnga thlir tur a ni a, beiseina nen hmalam en zawk tur a ni," tiin an result vanga a buai loh thu a sawi.
Wales hian an thiampuipa Gareth Bale an chhawr thei lo a, Real Madrid forward hian fanu a neih thar avangin ram tana koh a ni lo. Arsenal midfielder Ramsey erawh inhliam vangin a tel thei lo thung.
Bale leh Ramsey an awm chuan team dang daih an nih theih avangin coach Coleman sawi ang chiahin Wales tan hlauhthawnna tur a la awm lo. Ukraine an hneh loh ṭum hian Liverpool midfielder Joe Allen a khelṭha a, midfielder Jonathan Williams-a'n Crystal Palace-ah khelhna hmun chang tam lo mah se international level-ah chhawrtlak a ni tih a lantir bawk.
Coleman-a'n player pawi-mawh awm loh chhungin team a siksawi a, inenchhinna hun atan a hmang a. Tlarhma lam chu Bale a awm phawt chuan ngaihtuah awm a ni lo a, tlarhnung lam erawh khawvel huapa player ṭha hmachhawn tur chuan an la nem deuh.
Inkhel dang
Thawhṭanni zan vek khan Northern Ireland chuan friendly match-ah Slovenia chu Conor Washington goal khat khung hmangin 1-0 in an lo hneh ve thung.
QPR striker Washington hian minute 42-naah he inkhela goal awmchhun hi a khung a, Northern Ireland hian a zawnin match 10 chhung hneh loh tawng tawh loin record thar an siam theih phah a ni.
Northern Ireland boss Mi-chael O'Neill chuan, "Conor hian tharum a neih ṭhat bakah a thiam tel bawk a, ani hi kan tan player pawimawh a ni zel dawn," tiin goal awmchhun khungttu lakah beiseina a nei sang hle.