English club-ten min duh - Ibra

Zlatan Ibrahimovic chuan Premier League club zingah amah lakluh duhtu an awm thu a sawi. Sweden striker hi tun season tawp rualin Paris St-Germain-a a contract neih lai a tawp dawn.

Kum 34-a upa Ibrahimovic hi a kum uaithla lam deuh tawh ni mah se goal khung a thiam a la theihnghilh chuang lo. English club lian Arsenal, Manchester United leh Chelsea te chuan an ngaihven hle a sawi a ni.

Europe-a league lian palia cham-pion nomawi chawi tawh Ibra chuan, "Premier League club zingah min lakluh duh an awm a, eng nge lo thleng dawn chu kan hria ang chu. Mahse, mimal thutlukna ringawt a ni thei lo a, inneih ang maiin mi pahnih inremsiamna a nih a ngai ang," tiin a sawi.

Hetih lai hian pa ṭawngduh ve tak Ibrahimovic hian nipuiah hian inkhelh a chawlhsan thut maitheih thu leh a hma hun chu sawi chian theih loh a nih bakah thil engpawh thleng thei a nih thu a sawi tel bawk.

Striker chanchin ngah ve tak Ibrahimovic hian Ajax chu Dutch League title a lakpui hnuah Juventus nen Serie A-ah vawi hnih a champion a, Italy league-ah vek hian Inter Milan chu vawi thum a champion pui bawk. Spain lamah kalin Barcelona chu La Liga title a lak pui hnuah Italy-ah bawk kir lehin kum 2010-11 khan AC Milan a champion pui bawk a ni.

Milan a chhuahsan hnu hian France lamah kalin PSG-in tun hnai season li chhunga Ligue 1 title an lak theih nana thawhlawk ber ang hiala ngaih a ni nghe nghe.

Tun thlatir khan PSG hian Troyes chu 9-0 in an sawp a, he inkhelah hian Ibrahimovic hian goal li ngawt khungin league title an chawi zui bawk.

Hemi ṭum hian Ibra hian season tharah chuan France-ah a cham tawh loh tur thu a sawi bakah Eiffel Tower chu a lim (statue) a an thlak a nih chuan a inngaihtuah ṭhat tur thu fiamthuin a lo sawi tawh.

Ibrahimovic hian ram tan match 111 a khelh aṭangin goal 62 a khung tawh a, a goal khung zingah hian kum 2012 a England nen frieldly match an khelh ṭuma a bicycle kick chu sawi hlawh berte zinga mi a ni.