Argentina-Uruguay thlawptu FIFA president

FIFA president Gianni Infantino chuan kum 2030 World Cup in thlen ṭawm tuma Argentina leh Uruguay thawh hona chu a thlawp thu a sawi.

Kum 2030 World Cup hi a kum 100-na tur a ni chiah dawn a, kum 1930 khan Uruguay hian World Cup hmasa ber lo thleng tawhin final-ah Argentina chu 4-2 in an hneh a ni.

Argentina hian kum 1978 khan World Cup an lo thleng ve tawh bawk a, final-ah Netherlands chu 3-1 a hnehin an World Cup nomawi hmasa ber an lo chawi ve tawh bawk.

Infantino chuan, "Ngaihtuah ngai ber chu World Cup hi ram pakhat chauha khelhin nge ram pahniha khelhin a hlawhtlin zawk ang tih hi a ni. FIFA chuan ram pahnihin World Cup an inthlen ṭawm hi ṭha a ti lo a, a mimal tak erawh chuan ka thlawp thung. Kum 2030 hi kum pawimawh tak a nih avangin kan zah a ngai a ni," tiin World Cup thleng hmasa ber tu Uruguay-in World Cup kum 100-na puala Argen-tina nen football khawmpui lian thlen an dil chu awm a tih thu a sawi.

FIFA World Cup hi ṭum khat chiah ram pahnihin an la inthlen
ṭawm a, kum 2002 khan Japan leh South Korea-te'n hlawhtling takin an lo thleng tawh a ni.