Sri Lanka sawptu South Africa

Thawhṭanni zan khan World Twenty20 inkhel awmze nei tawh loah South Africa chuan wicket riatin Sri Lanka an sawp a, semifinal lut zo lo mah se hming-
ṭha takin South Africa-in India an chhuahsan.

Champion lai Sri Lanka erawh mualpho taka an haw a ngai dawn ta a, inkhel an hmachhawn paliah vawi khat chiah hnehna changin an team hneh tak hi Afghanistan an ni.

Delhi khawpuia inkhelah hian bat hmasa zawk Sri Lanka-in run 120 tlin hramin over 19.3-ah an out vek a, opening batsman run 21 siamtu Dinesh Chandimal leh run 36 siamtu Tillakaratne Dilshan-te an out hnuah Sri Lankan batsman dang an che hleithei tawh lo.

South Africa tan an target run 121 siam turin hun rei a ngai lo. Over 17.4-ah run 122 siamin mi pahnih chiah an hloh a, an chak chiang hle.

Proteas tan Hashim Amla chuan run 56 siamin a tawp thleng a dam a, captain Faf du Plessis chuan run 31 siamin AB de Villiers chuan run 20 siamin a tawp thleng a dam bawk.

South Africa hian Super 10-a match an hmachhawn paliah vawi hnih hnehna chang turin Sri Lanka bakah hian Afghanistan an hneh a, West Indies leh England lakah tlawmin run 229 zet an siam tawh hnua England-in an lehthal leh chu tun tournament-a inkhel hmuhnawm pawl a ni.