ICC World Twenty20 Hneh loh tawng lo Kiwis hmaah England

Zanin dar 7:00-ah ICC World Twenty20 semifinal hmasa zawk khelh a ni dawn a, New Zealand leh England-te final luh inchuhin Delhi khawpuiah an innuai dawn.

Inelna ṭan hmain team pahnih hi champion tura rinkai zingah an tel lo - mah se inelna ṭan a nih hnuah erawh team pahnih an hmuhnawm takzet a, semifinal luh an phu ti lo an awm kher lo ang.

Semifinal kalkawng

Group 1 hmahruaitu New Zealand-in Super 10-ah hneh loh an tawng lo a, an awmna group-a awm India, Australia, Pakistan leh Bangladesh te hneh veka semifinal lut thei team hi dah hniam theih an ni lo ang.

England hi sawi nep theih an ni bik lo - an match hmasa bera West Indies an hneh loh hnuah an insiamṭha lehnghal a, anni aia rinkai zawk South Africa leh Sri Lanka bakah West Indies hnehtu Afghanistan hnehin semifinal an lut.

Three Lions (England cricket team sawina) hian Group 1-ah pahnihna dinhmun an luah a, West Indies nen point hmuh zat in ang chunga pahnihna an nih chhan hi run rate-a an chhiat zawk vang a ni.

Ngaihngam England

Super 10-a chak vek thei New Zealand hmachhawn hi châk-awmin lang lo mah se duh thlan theih nise England hian inelna thlengtu India hmachhawn ai chuan Kiwis hmachhawn hi an châk zawkin a rinawm.

Nikum khan T20 leh ODI series-ah England hian Black Caps hi an lo hneh ve ve tawh a, World T20 khelh a nih hma hian warm up match-ah wicket rukin an lo hneh tawh bawk.

England all-rounder Ben Stokes chuan, "New Zealand aiin khelmual kan hrechiang zawk a, hei vang hian anni aiin chakna chance kan nei
ṭha zawk. Nikum nipui laia kan hneh bakah warm up match-ah kan hneh bawk avangin kan rilru lam pawh a inpeih zawk," tiin Kiwis hmachhawn turin a inpeih hle.

Three Lions hian zanina an inkhelhna tur Feroz Shah Kotla-ah tun hnaiah match hnih an khel tawh a, Afghanistan leh Sri Lanka an hneh. An khelmual hriatchiana an in-khel tur hi Ben Stokes chuan an din--hmun a ṭha zawkah a ngai a ni.

Zuam sual awl Kiwis

World Twenty20 ranking-ah New Zealand pahnihna an ni a, ODI World Cup 2015-ah final an lut bawk. ODI leh T20 tournament an khelh hnuhnunga match 13-ah vawi khat chiah an tlawm a, chu chu World Cup final-a Australia an hneh loh kha a ni.

New Zealand innghahna chu an bowling hi a ni a, batting lama innghat England nena an inhmachhawn tur en ti châkawm zualtu chu hei hi a ni.

Kiwis tan all-rounder Mit-chell Santner hi an innghahna ber a ni leh dawn a, batting lam-a a ngaihtuahawm loh ai mahin Santner hi bowling lamah a ropui. An match hmasa bera India an hneh ṭumin over li a vawmah run 11 chauh pein wicket li a la thei a, Indian batsman-te tana mangchhia hi English batsman-te puan thuah teltirtu a ni thei.

Mahse, New Zealand bow-ler-te tan English batsman-te zuam ngawt chi an ni bik lo. Super 10-a match li an hmachhawnah England hian run 140 aia tlem siam an nei lo.

An match hmasa bera West Indies an hneh loh ṭum pawhin run 182 an siam a, Windies tana century siamtu Chris Gayle vang liau liauin an tlawm. An match hnihnaah South Africa hmachhawnin target 230 zet nei mah se over 19.4-ah an target hi an umpha tho a, run 83 siamtu Joe Root a hmuhnawm hle.

Bowler nei ṭha Afghanistan an hmachhawn ṭum pawhin England-in run 142 an la tlin cheu a, an match hnuhnung bera Sri Lanka an hmachhawn
ṭumin run 171 zet an siam bawk.

Player langsar

England-in Super 10-a match li an khelha match hnih chhung man of the match ni thei batsman Joe Root hian en bik a hlawh leh ang. Kum 25-a upa batsman hian tun inelnaah ringawt run 168 a vaw chhuak tawh a, New Zealand fielder-te tlan kualtir turin a ṭha tawk.

Three Lions tan Afghanistan an hneh ṭuma man of the match all-rounder Moeen Ali leh Sri Lanka laka ropui taka khel wicket-keeper batsman Jos Buttler-te chet ṭhat leh ṭhat loh a pawimawh bawk ang.

New Zealand bowler zingah tun tournament-a wicket kua la tawh spin bowler Mitchell Santner leh fast bowler ṭha Mitchell McClenaghan-te hi mut ti tui lo tham an ni a, opening batsman Martin Guptill leh captain Kane Williamson-te hi eng bowler tan pawh hmachhawn châkawm an ni lo.

Bayliss thukhawchang

England coach Trevor Bay-liss chuan, "Super 10-ah khan boruak sang tak hnuaiah kan chak fo a, zanin kan inkhel tur pawh a boruak sang dawn mah se kan zam phah lo ang," tiin a player-te a rintawk thu a sawi.

Bayliss chuan sawi chhun-zawmin, "Kan inkhelhna tur khelmualah hian vawi hnih kan inkhel tawh a, chuvang ngawt chuan kan chak ngawt dawn tihna erawh a ni lo. New Zealand hi an inkhelhna hmun a zira insiamrem zung zung
ṭhin an ni a, chak a harsa dawn. Mahse, final luh ngei kan tum avangin theihtawp kan chhuah ang," tiin chak ngei an tum.

Team pahnih khaikhinna

England (World ranking: 5-na)

Semifinal kalkawng

M1 : West Indies lakah wicket rukin an chak lo

M2 : Wicket hnihin South Africa an hneh

M3 : Run 15-in Afghanistan an hneh

M4 : Run 10-in Sri Lanka an hneh

Coach : Trevor Bayliss

World T20 thlen san ber : Champion (2010)

Run siam hnem : Joe Root (168 runs)

Wicket la hnem : Willey (six wickets)

New Zealand (World ranking: 2-na)

Semifinal kalkawng

M1 : Run 47-in India an hneh

M2 : Run riatin Australia an hneh

M3 : Run 22-in Pakistan an hneh

M4 : Run 75-in Bangladesh an hneh

Coach : Mike Hesson

World T20 thlen san ber : Semifinal (2007)

Run siam hnem : Martin Guptill (125 runs)

Wicket la hnem : Mitchell Santner (nine wickets)