Aizawl FC leh Salgaocar khelh hun sawn

MPL champion Aizawl FC khelh hmabaka a pawimawh bera ngaih theih Salgaocar nena an inkhelh hun chu April 11, Thawhṭanniah sawn a ni.

Goan club hi tun season bika Aizawl FC mikhual hnuhnung ber tur a ni a, The People's Club hi an relegate a nih chuan Mizoram chhunga I League match hnuhnung ber a ni thei a, inkhel pawimawh bik a ni.

Aizawl FC hian Zirtawpni zan dar 6:30-ah Shillong Lajong FC an hmachhawn dawn a, North East Derby hi Ten Sports-ah a en theih ang.

Nimin khan Aizawl FC-in Shil-long an thleng a, match pawi-mawh tak hmachhawn hma-in ni hnih an practice thei ang.

MPL champion hian in-hliam leh damloh vangin Immanuel HS Lalṭhazuala leh R. Malsawmtluanga te hruai tel lo mah se East Bengal nen an inkhelh ṭuma hnawhchhuah Lalramchullova leh Emma Chigozie ten Mohun Bagan an hmachhawn theih loh hnuin squad-ah koh kir an ni.

Aizawl FC manager K. Mal-sawmkima chuan, "Khualmualah hian kan game a danglam lo. Huaisen takin player-te'n an khel a, an zam phah lo. Football-ah chuan chak loh theih chu ni tho mah se keini chuan chak tumin kan khel ang. Shillong Lajong lakah hian point thum hlawhchhuah ngei kan tum," tiin Vanglaini palai a hrilh.

North East derby hmasaah Aizawl FC leh Lajong te goal awm loin an indraw a, tuna an inkhel tur hi tlak leh dam inkar a ni. MPL champion hian April 6 khian Sporting Goa an hmachhawn zui dawn a, April 11-ah Salgaocar an mikhual leh ang.

Matchday squad-ah player 18 ziah luh theih a ni a, chutihrualin practice-naah inhliam palh theih a nih avangin Lajong hmachhawn turin player 19 an kal a, Khwetelhi Thopi chu hruai tel a ni. Rangdajied United FC winger hlui Thopi hi RG Stadium, Mualpuiah la inlan lo mah se Bengaluru FC leh Mumbai FC an hmachhawn ṭumin bench aṭangin a lut ve ve a, Naga zinga I League khel hmasa ber ni mah se chhuan tham player a ni lo.