Arsene Wenger a nghing lo

Arsenal-in Premier League nomawi an chawi hnu-hnung ber aṭanga tehin ṭhang--khat lian dawn a liam tawh a, Arsene Wenger-a'n inkhel hmuh-nawm leh nomawi hmanga a lo tih lawm tawh Gunners fans zing-ah French manager ban duhtu aw rawl a ring ta!

Tun hnai sea-son hnih liam taah khan Wenger hian FA Cup a chawipui a, hei hian a dinhmun nghing zualpui a sawh ngheta ngaih a ni. Kuminah erawh an nomawi kawl lai an thlauh tawh a; Champions League-ah an tlak tawh bakah league-ah Leicester City leh Tottenham hnuaiah an awm mek.

A hma hun a derthawng em? tih an zawhna chhangin Wenger chuan, "Buaina ka nei lo a, ka hmangaih Arsenal tan hian ka theihna zawng zawng ka hlan avang hian season tharah pawh he hmunah hian ka la awm ang," tiin Emirates Stadium chhuahsan lam a la ngaihtuah lo tih a sawi.

Gunners fan-te chuan club thuneitu leh an manager chu player ṭha lei nana sum seng ṭha ngam lohah an ngai tawh a, title aia sundawnna ringawt ngaihtuahah an ngai tawh a ni. Arsenal hian nipui transfer lai khan Chelsea-a hmun nghet chang lo keeper Petr Cech bak hming langsar lakluh an nei lo.

French manager chuan a ngaihdan sawi chhunzawmin, "Kan dinhmun hi tun hnaia kan result aṭang hian an teh leh mai ṭhin hi a dik tawk lo. Hmathlir ṭha tak kan nei tur a ni a, kan hnathawh chhan kan chiang tur a ni bawk. He club tan hian a ṭha thei ang bera thawk tur a rawih ka ni a, chumi tur chuan ka thawk," tiin a sawi.