Thlasik khaw vawt hlau lo Arsenal

Premier Lesgue champion tur sawi nan a la hma deuh, champion tum leh champion tum ngam bakah theihna nei erawh sawi ngam a ni - chutiang club kan sawi dawn a nih chuan Arsenal hi a tlarhma lama ṭhu tur an ni ang.

Mikel Arteta naute hian Thawhlehni zan khan Luton Town 4-3 in an hneh, vawi hnih hma an hruai hmasakna sutsak an nih bakah an hnufual a, a tawpah erawh 'Champion Player' tia sawi ngam Declan Rice hmangin chakna goal an khung.

Gunners hian EPL match 15 aṭanga point 36 hmuin hma an hruai chhunzawm a, anmahni hnaih bertu Liverpool aiin point ngain an sang zawk - Reds hian nizan khan Sheffield United an hmachhawn a, an inthlauhna erawh a la danglam thei.

Laipui a puak

Kai thar Loton Town khelmual Kenilworth Road Stadium kha mi 11,500 lenna a ni a, English football inelna sang ber khelh nan chuan a zau lo. Tunlai boruak thlir chuan Arsenal hi chak chiang tura rinkai an ni a, goal khung tam tura ngaih an ni bawk.

Rin lawk ang ngeiin minute 20-naah Bukayo Saka siamsak chu Gabriel Martinelli-a'n a lirin goal kilah a pet lut nghal a, engzat tak khung belh ang maw tih chu zawhna a ni chhunzawm. Mahse, rin ang ngawt chu a ni mai bik lo.

Alfie Doughty-a corner pet chu Gabriel Osho chuan lo tauh lutin a sut a, striker Gabriel Jesus khung pawh Elijah Adebayo hmanga an sut bakah Chelsea midfielder hlui Ross Barkley hmangin hma an hruai zui a, inkhel boruak a danglam daih.

Jesus-a'n goal khung chauh duhtawk loin, a ball fing pek hmangin Kai Havertz-a'n an goal thumna a khung a, goal a khung zawh rualin ball lain mual laiah a tlan phei nghal, chak tumin goal khung belh leh ngei an tum tih a takin a lantir.

Hun a tawp dawn hnai a, hamrik hnuhnung ber a rik hma an hun ṭha hnuhnung berah captain Martin Odegaard-a cross chu Rice-a'n a lo tauh lut nawlh, team nem hnem mai tura an ngaih lakah an chak hram a, goal hlu bik a ni reng tawh bawk ang.

Famkim lo

Arsenal inkhel a hmuhnawm a, striker Jesus dam leh tain inkhel hmelhmang tam tak a ti danglam - tun hnaiah Arteta nauten goal khung an harsat lo a, an goal nawr nat dan chu duhthusam vek ni lo mah se a ṭha tawk thawkhat viau.

Rice hoa ding midfield hi an nghet ṭha a, tun season kal lai postion mala kan thlir chuan an ṭhatna lai ber a ni hial mai thei. England international hian Odegaard leh Havertz te a dinpui thei, player dang pawh a khelhpui thei zel.

Duhthusam lo lai leh titi ti tamtu an nei a, chu chu goalkeeper chungchang a ni. Luton Town lakah pawh dan pangngaiin David Raya chuan bul a ṭan leh a, a nek chhuah tak Aaron Ramsdale ṭantute sawi nuam tih tur takin Raya hi a che ṭha tawk lo.

Adebayo-a'n an goal hnihna a tauh luh dawn laiin Raya hian ball kal dan tur a chhut fuh lo a, a khawih phak tura ngaih a khawih lo. An goal thumna Barkley-a'n a shot pawh kha amah zawnah a kal a, dan theih ngei tura ngaih kha a bawh ṭhelh tlat.

Inkhelh banah Arteta chuan, "Team pumpuiin goal ven dan ṭha zawk kan neih a ngai, tihsualah mimal kan indem ngai lo. Hei hi tun hma aṭanga kan tih ṭhin dan a ni a, tunah leh nakin hunah pawh mimal dem hi kan ti ngai lo ang," a ti.

Hrem hmabak Arteta

Arsenal manager Mikel Arteta-a'n hun tawp dawna Declan Rice-a goal khung chu nasa takin a lawm a, hei vang hian yellow card pek a ni. Tun season kal laiah yellow card vawi thum a hmuhna niin, match hmabakah a naute a enkawl thei dawn lo.

Spanish manager Arteta hian nasa takin dan a bawhchhe hran lo, mahse khelmual chhung a lo va rap tel ve deuh niin a lang - hei hi referee Samuel Barrott chuan card phawrh nan a hmang. Kar tawpa Aston Villa nen an inkhelh hunah mual sirah a awm thei dawn lo tihna a ni.

Arteta chuan, "Ni thum dan lekah kan inkhel zel a, hnehna chan ngei a ngai ṭhin bawk si. Chutiang boruak karah huan hun tawp dawna chakna goal neih phei chu thil hlu bik a ni a, thil thleng chu engpawh ni se a boruak kha a nuam.

"A nuam ka tiin ka hlim takzet a, a bik takin hun tawp dawnah khan ka hlim zual," a ti. Yellow card a hmuhna chu engtiang taka sawi leh chinfel tur nge a nih erawh a sawi hran lo, hremna hmachawn turin a inhuam niin a lang.

Lei man awm Declan Rice

Arsenal player man tam ber a ni a, pound maktaduai 105 man ngawt a nih avangin nipui bazar lai titi luah khattu a tling - a hunlai kha chuan Gunners ṭantute zingah ngei pawh West Ham captain an leina zat hi tam mah mah titu an awm.

Mahse, England inter-national midfielder hian sum tam taka lei a nihna hi khelmual chhungah thil tih hmangin a lantir zel. Manchester United nen inkhel pawimawhah 2-1 a hma an hruai theihna a khung a, tunah goal pawi-mawh bik a khung leh ta.

Champion lai Manchester City an hmachhawn ṭum khan, goal an khung zawk a ni satliah lo a, tun hma lama an ngam hleihtheih loh kha a khelhah an ngam zawk; a chhan lian tak chu mual laia Rice a din vang a ni, tunah chuan a man pek belh a ngai a nih pawhin an hreh lo ang.

Mikel Arteta chuan, "Rice kha a khel ṭha lehpek hle a, ball semtu leh inkhel khaikhawmtu a nih bakah player dangte tana hruaitu ropui a nihna kan hmu leh ta. Goal thum a khung tawh a, goal lina pawh a khung nge ang - a hun erawh ka sawi lawk thei lo," a ti.