Dampuia hnuaiah Chanmari FC an chak

Chanmari FC-in coach Laldampuia hnuaia an match hmasa berah nimin khan Electric Veng FC chu 2-0 in an hneh a, Zote Toyota MPL10 inkhelah point thum hlu tak an hlawhchhuah avangin table-ah pahnihnaah an invawrh chho.

RG Stadium-a inkhelah Chanmari FC an chungnung a, minute 16-naah goal an khung avangin chak turin harsatna an tawk lo. Goal khatna hi R. Laldanmawia corner pet aṭanga lut a ni a, midfielder Thanglalven Gangte-in a tauh lut ṭha hle.

Second half ṭan aṭanga minute sarihnaah Chanmariin an khung belh a, Crespo Vanlalhriatpuia cross chu Electric Veng defender Kapkhankhual-a'n an lamah a ti lut. Chanmari hian goal dang khung belhna tur hun ṭha dang pawh nei mah se Danmawia vanneih ṭum a ni lo a, goal hmaa Khawpuimawia leh Laltlanzova vanneih ṭum a ni lo bawk.

Phase 1 hmahruaitu Chanmari FC-in phase 2-ah hnehna an chang ta a, match 12 aṭangin point 22 hmuin pahnihnaah an awm a, pakhatna Mizoram Police point khat chauhin an pha lo. Chutihrualin match hnih khelh tur a la awm a, Chanmari leh pangana Aizawl FC inthlauhna hi point thum chauh a nih avangin semifinal khel tur a la chiang lo.